Il festival che s’auda tier Flem

La stad 2009 ha Mathias Kleiböhmer surpriu il post d’indendant d’in niev festival da musica a Flem. Atgnamein eis ei buc in niev. Il violonist dalla Kammerphilharmonie dil Grischun cun domicil a Fidaz ha surpriu da siu antecessur Mathias Ziegler il festival «Flims Klang». In grond diember da hosps da vacanzas ed indigens havevan deplorau la fin da quell’attracziun dalla stad. Kleiböhmer ei staus motivaus da menar e sviluppar vinavon quella. Il num «flimsfestival», accumpignaus dalla gegia verda, ei daventaus daferton quasi ina marca.

Essenziala uniun da promoturs

Gia naven dall’entschatta eis ei gartegiau agl intendant d’organisar in program variont cun musica classica d’in ault livel. «Mintg’onn vegnan artistas ed artists da lunsch e damaneivel, per delectar in publicum en loghens plitost nunusitai», descriva Mathias Kleiböhmer l’idea ch’ei davostier. In tschep da visitadras e visitaders fideivels vegneva mintg’onn als concerts. Ord il ravugl da quels ei l’idea naschida avon 15 onns da fundar in’uniun dils promoturs da «flimsfestival». Ella broschura nova culla gegia verda scriva Ueli Seefeld, il president actual da quell’uniun: «Igl ei legreivel che nus havein saviu augmentar cuntinuadamein il diember da commembers. Aschia ei nossa contribuziun al ‹flimsfestival› oz ina part impurtonta dil budget da quel.» La retscha musicala seigi daventada in impurtont element dalla cultura locala. Pli che 200 fauturas e fauturs fan part oz da quell’uniun.

Liunga gliesta da nums

Sper las purschidas da sport e moviment ella destinaziun turistica enriheschan ils concerts las attracziuns da stad. Gl’intendant sa engaschar musicistas e musicists renomai che dattan concerts sigl entir mund, el dat denton era schanzas a giuvens talents, aschia per exempel il pianist indigen Baldur Schmid. Il «flimsfestival» ei stau ina sigliera per el. Era gronds chors sco il EuroChoir, cugl ensemble consonus, la harfista Flora Papadopoulos, il cellist Flurin Cuoz e la violonista Flurina Sarott, Clau Scherrer e Rilana Cadruvi ein sepresentai al festival. Las cantaduras e soras Astrid ed Ingrid Alexandre ein stadas, gl’actur Jürg Kienberger, gl’autur Lukas Hartmann, il clarinettist Marc Lardon, il flautist Maurice Steger ed il Mnozil Brass ein sepresentai. La gliesta ei liunga: Ella cuntegn persunalitads naven dad Andi Schnoz (ghitarrist) ed André Desponds (pianist) tochen Viviane Chassot (accordeonista) e Yuval Wolfson (posaunist).

Sco 2012 cun Gion-Andrea Casanova

Siu 18avel program ha Mathias Kleiböhmer concepiu puspei cun bia creativitad. La gronda part dallas producziuns ein denter ils 11 ed ils 20 da fenadur 2026 e dils 13 tochen 22 d’uost 2026. Ils concerts culs pli differents artists ed instruments ein ton en loghens cumprovai sco era novs. Aschia per exempel ella casa d’exposiziuns Casa Melna amiez Flem. Quella ei la stad proxima vitta e vegn a sepresentar semplamein sco object d’art singular, sco «casa svidada». Leu fa il DJ da stil classic Jürgen Grözinger resunar preits e plantschius dalla casa cun tuns naven dil baroc tochen tiel club sound.

In liug cumprovau da concert ei ils 16 d’uost la talina dalla stalla Schmid a Scheia. La stad 2012 ha il cantautur, cumponist e musicist Gion-Andrea Casanova sunau leu ensemen cun Rolf Caflisch, Andreas Coray e Mathias Kleiböhmer. La band indigena haveva incantau lezza gada cun musica autentica, romantica, cun jazz frestg e schizun groove. Uonn suna in ensemble classic cun Daniel Kagerer, Heidi-Maria Makkonen, Susanne Saksenvik e Christine Meyer l’ovra «Die Jahreszeiten» da Joseph Haydn. Il «flimsfestival» dalla stad entscheiva dil reminent era en in liug cumprovau: Ils 11 da fenadur ei in concert ella stiva dall’ustria al Lag la Cresta. Andrea Bischoff sepresenta sco solista all’oboa. Ils visitaders san udir duas interpretaziuns dad ella ensemen cugl ensemble le phénix. Il quartet d’oboa ei l’ovra pli enconuschenta da W. A. Mozart per oboa ed instruments a corda.