L’ustaria sin il Heidsee duai restar ustaria

L’ustaria «Forellenstube» a Lai sa chatta en in lieu prominent sin il rempar amez il Heidsee. Dapi bundant in onn ha questa ustaria – che purscheva tratgas da selvaschina e litgiva locala – dentant serrà sias portas. Sco ch’il possessur Hermann J. Ittlinger ha confermà envers la FMR, ha el stuì renunziar al manaschi pervia da motivs famigliars: «Mia dunna e mia figlia na pon betg pli lavurar per motivs da sanadad e persul na vai betg. Perquai hai jau decis da serrar e vender l’ustaria.»

In potenzial cumprader ha Hermann J. Ittlinger entant gia chattà – la vischnanca burgaisa da Vaz. Quella decida a la proxima radunanza da burgaisas e burgais, vul dir glindesdi saira ils 16 da mars 2026, davart la cumpra. Cunvegnì è in pretsch da 2,3 milliuns francs per la parcella 2824 e l’edifizi che cumpiglia sper l’ustaria er in’abitaziun da tschintg chombras, ina garascha ed in local da sfradentar. E quai duai da princip era restar uschia, sco che la presidenta da la vischnanca burgaisa Luana Bergamin ha ditg envers la FMR: «L’ustaria sa chatta en in bellezza lieu ed è impurtanta per l’entira regiun. Cun la cumpra vulain nus mantegnair quella ed impedir ch’ella vegnia forsa spazzada e remplazzada cun ina chasa da vacanzas.»

Blers interessents

Sco che la presidenta da la vischnanca burgaisa ha punctuà, vegn la cumpra er approvada dals ulteriurs purtaders da prestaziun regiunals: «Nus avain discurrì cun ils responsabels da la vischnanca e da las organisaziuns turisticas. Er els èn da l’avis ch’ins duai mantegnair l’ustaria per indigens e giasts.»

Plans pli concrets n’hajan ins entant anc betg per l’ustaria. Ins veglia e stoppia en mintga cas spetgar la decisiun da la radunanza da burgais. «Ma blers han gia annunzià lur interess da surpigliar l’ustaria», ha Luana Bergamin fatg a savair. Pli probabel saja dentant tuttina ina schliaziun temporara, avant ch’ins decidia a lunga vista: «Idealmain pudain nus avrir l’ustaria questa stad en furma da pop-up, vul dir per ina stagiun cun in concept temporar. I fiss simplamain donn, sche l’ustaria fiss serrada anc ina stad.» Anc betg sclerì saja en quest connex, tge consequenzas che la sanaziun dal rempar haja per il manaschi da l’ustaria. Quella sanaziun vul la vischnanca Vaz realisar ils proxims onns.

Credit era per mesiras immediatas

Da sclerir fiss plinavant era, sche l’edifizi amez il Heidsee basegnass sanaziuns. Quel è vegnì construì l’onn 1905 e la davosa giada renovà e cumplettà dal 1995, pia avant passa 30 onns. Sper il credit da 2,3 milliuns francs per la cumpra decida la radunanza da burgaisas e burgais damai era davart in credit da 300 000 francs per mesiras immediatas sco apunta studis da sanaziun. Cura ch’i va glindesdi saira per la «Forellenstube», ston las burgaisas ed ils burgais pia decider davart totalmain 2,6 milliuns francs.