A Flem duei ei dar habitaziuns pagablas

A Flem ei la munconza d’habitaziuns gronda. Quei muossa era il studi «Monitor 2» che la Scola aulta specialisada dil Grischun (SAS GR) ha fatg igl onn 2022. Lu eran mo siat da strusch 5200 habitaziuns a Flem vitas e cunquei promtas per prender a tscheins ni cumprar. Tenor medem studi haveva Flem avon treis onns ina cumpart da 70% da secundas habitaziuns. Quei ei la pli aulta la cumpart el Grischun ed en Svizra. Denter ils onns 2017 e 2021 hai tenor «Monitor 2» dalla SAS GR  dau 988 midadas da maun a Flem. Ina pintga part dad 11% ein stadas midads d’empremas en secundas habitaziuns.

Da Flem per Flem

La populaziun da Flem ha decidiu ils 9 da fevrer 2025 che la vischnaunca dueigi cumprar per circa quater milliuns francs la parcella nr. 784, la parcella Burkhardt che schai  denter Flem Vitg a Fidaz sill’altezia dalla casa d’attempai Plaids. Cun quella cumpra ha la vischnaunca vuliu crear ina pusseivladad speciala da realisar in project che duei porscher habitadis pagabels per persunas da Flem. Perquei ha la vischnaunca era publicau ina concurrenza d’investurs .La gruppa d’iniziants indigena che consista dad Anni Uhl, Nina Flüsch, Sabrina Hänggi, Lea Öchslin, Yves Keller e Sebastian Boss, separticipescha dalla concurrenza d’investurs perquei ch’ella vul  realisar in spazi d’habitar pagabel silla parcella Burkhardt a Flem.

Societad cooperativa

Las sis persunas vulan sco emprem pass  fundar la cooperativa da construcziun Sardona scrivan ella communicaziun allas medias che per els sco gruppa d’iniziativa seigi ei clar che quella schanza cun la parcella Burkhardt stoppi vegnir tratga a nez per in spazi d’habitar che surveschi a liunga a vesta alla populaziun da Flem. Da fundar la cooperativa da construcziun Sardona seigi ina proposta per garantir igl engaschi per spazi d’habitar pagabel a liunga vesta, scrivan ils iniziants en ina communicaziun. La societad cooperativa d’utilitad publica duessi tenor lur idea funcziunar sco model democratic che hagi negins interess speculativs, mobein che s’engaschi per prezis da habitadis gests e pagabels.

Ad interim en concurrenza

La finamira suenter l’’informaziun da gliendisdis proxim seigi ei da fundar la cooperativa da construcziunSardona. La finamira a liunga vesta dils iniziants eis ei da crear dapli spazi d’habitar pagabel per indigens da Flem. Dalla communicaziun da medias tarmessa il venderdis vargau resorta buca contas habitaziuns ni casas che che la nova cooperativa da construcziun vegli realisar. Tenor Sebastian Boss seigien el e ses tschun collegas dalla gruppa d’iniziativa ella concurrenza d’investurs che la vischnaunca hagi lantschau. La planisaziun detagliada dallas habitaziuns silla parcella Burkhardt seigi aunc buca clara. La parcella sezza ha ina surfatscha da 3018 meters quadrats. Tenor Sebastian Boss quent’ins cun in tscheins da 20 francs per meter quadrat.

Habitadis pagabels ein scars

«L’idea per nossa iniziativa ei naschida en nies contuorn persunal» di Yves Keller ch’ei in dils iniziants che vulan fundar la societad da construcziun cooperativa Sardona. «Biara glieud da Flem sa ch’il spazi da habitar pagabel en nies vitg daventa adina pli scars. Cun ina cooperativa savein nus scaffir ina sligiaziun che funcziunescha era a liunga vesta e che vegn purtada dalla populaziun sezza», declara Yves Keller ella communicaziun da medias.

Project vegn acceleraus

L’entschatta digl onn ei la gruppa d‘iniziativa cun ils sis giuvens da Flem separticipada ufficialmein dalla concurrenza d’investurs che la vischnaunca ha publicau. La gruppa ha survegniu la risposta ch’ella vegni admessa sco offerenta pusseivla. Gia il zercladur 2026 vul la gruppa perquei inoltrar il project architectonic. Ed ils proxims meins duei era la structura dalla cooperativa vegnir sviluppada. Plinavon vegni ins a luvrar vid la finanziaziun en collaboraziun cun persunas dil fatg, stat ei scret ella communicaziun.

Mantener la creaziun dalla valur

Sebastian Boss ch’ei cun-iniziant dil project accentuescha l’impurtonza locala dall’idea. «Nus sis vivin sezs a Flem ed essan tuts colligiai stretgamein culla regiun. Perquei eis ei impurtont per nus da sviluppar in project ch’ei vegnius sviluppaus e purtaus dallas dunnas e dils umens da Flem e che mantegn la creaziun dalla valur el vitg da Flem.» La gruppa d’iniziants vegn ad informar la publicitad ils 23 da mars 2026.