La forza idraulica resta pütta dal provedimaint d’energia

L’istorgia da la radunanza generela da las Ouvras electricas d’Engiadina SA (OEE) da venderdi a S-chanf es svelt raquinteda. L’appruvaziun dal rapport da gestiun e dal quint annuel 2024/25 – la pura formalited.

Medemmamaing la decisiun da distribuir 4,2 milliuns francs in fuorma d’üna dividenda da 3 % sül chapitel d’aczias da 140 000 francs e l’attribuziun da 225 000 francs a las reservas dal guadagn prescrittas da la ledscha (vair box).

Il temp guadagno uscheja es gnieu druvo illa Loft99 a S-chanf per discuors, per raits e per pleds. Uscheja ho l’osp e nouv president cumünel da S-chanf, Gian Andrea Bott, circumscrit in sieu pled da bainvgnieu la pusiziun geografica e linguistica speciela da la vschinauncha da la Plaiv scu üna spezcha da regiun da cunfin i’l champ da tensiun traunter l’Engiadin’Ota e l’Engiadina Bassa. S-chanf es üna da las quatter vschinaunchas concessiunarias da las OEE ed do «allogi» – cun l’inchaschamaint da l’ova da l’En scu punct da partenza dal s-chalin superiur da las ouvras electricas S-chanf-Pradella – ad üna da las ouvras electricas importantas da las OEE. Il circul dal lö a l’occurrenza ho Gian Andrea Bott serro culs pleds: «Energia nascha lo, inua cha que regna tensiun.»

La finamira d’avair ün provedimaint d’energia sgür

Scu president dal cussagl d’administraziun ho il cusglier dals chantuns Martin Schmid rendieu attent a la situaziun geopolitica fich precara, cun adüna nouvs svilups e cun consequenzas brich previsiblas ed eir in speciel per la sgürezza sül champ d’energia. «Ün provedimaint d’energia favuraivel e sgür es però a la fin auncha adüna üna part centrela per il bainster», ho dit Martin Schmid, «perque stu quelo rester eir inavaunt üna finamira politica.»

In vista a quist fat füss ün provedimaint d’electricited stabil ed uschè independent scu pussibel d’importanza centrela per la Svizra. «Il nouv paquet da contrats cun l’UE ho da princip il potenziel per megldrer il commerzi d’electricited scu eir la sgürezza dal provedimaint in Svizra.» Cha l’autarchia nu possa però esser üna finamira, ho cuntinuo il cusglier da chantuns, «üna cunvegna d’electricited purtess avantags pustüt a reguard la tecnica ed eir üna tscherta sgürezza giuridica, per exaimpel tar la coordinaziun da las raits u tar l’access als marchos d’electricited europeics.»

Da l’otra vart chaschuness üna tela cunvegna però eir dumandas, per exaimpel scha e cu chi gnaro suottamiss in avegnir eir la dumanda dals retuorns a tschep al dret europeic u scha’l dret europeic da l’ambiaint gniss applicho in avegnir tar l’applicaziun da la forza idraulica u brich. I’l Cussagl dals chantuns cumainza uossa la debatta davart precis quista dumanda.

A la fin da sieu pled presidiel ho Martin Schmid affirmo l’importanza da la forza idraulica: «Ella es la pütta fideda pella sgürezza svizra dal provedimaint d’electricited ed üna funtauna d’energia uschè fideda scu eir perdürabla chi contribuescha a la stabilited da l’inter sistem.» Ch’ün provedimaint d’electricited sgür, pajabel e perdürabel  saja perque our d’vista naziunela ün’importanta finamira, ho’l constato.

Elecziun cumplementera i’l cussagl administrativ

I’l decuors da la radunanza generela es l’electro-indschigner Emil Bieri, il mneder da la producziun da las ouvras da partenedi lucernaisas, las CKW SA a Küttigen, gnieu elet i’l cussagl administrativ da las Ouvras electricas d’Engiadina SA.

La CKW SA es tenor egnas indicaziuns üna furnitura svizra principela d’indrizs d’energia e da tecnica d’edifizis. Ella proveda passa 200 000 cliaints finels cun electricited, occupa var 2000 collavuraturas e collavuratuors, da quels sun 350 giarsunas e giarsuns e posseda 10 % da las aczias da las OEE.

Emil Bieri succeda a Hanspeter Maeder, l’anteriur mneder da la producziun da la CKW SA chi’d es sto daspö l’an 2021 i’l cussagl administrativ e chi ho uossa demischiuno pervi d’üna müdeda da plazza interna.