Sulegl quadrat e fatschas a Ladir

Dieter Wittmann ha surpriu avon in onn la gestiun dalla Terrassa a Ladir. El sez ha fatg studis digl art ed ha gia dapi in temps ponderau da colligiar siu restaurant cun in liug d’exposiziun, numnadamein cul clavau ch’ei colligiaus cul restaurant. Dieter Wittmann ha dau num al clavau ‹La Stalla›. «Miu giavisch ei d’organisar mintg’onn in’exposiziun cun art contemporan.

L’entschatta fan mes amitgs Mari Otberg e Christian Stock», di  Dieter Wittmann. «Il mars proxim fetschel jeu probablamein in’exposiziun cun in artist svizzer da Sviz ed igl onn 2028 vuless jeu saver exponer las ovras d’ina artista ni d’in artist indigen.»

Provegnientschas differentas

Igl artist Christian Stock deriva digl art d’entagliar. Naven da 14 onns ha el che cumplenescha uonn siu 65avel onn da naschientscha frequentau la scola d’entagliaders. Stock descriva sia veta d’entochen dacheu cun pass da diesch onns. Cun 20 onns seigi el vegnius recepius sco absolvent dall’Academia digl art visual a Vienna. Cun 30 onns, raquenta Christian Stock, hagi el vendiu siu emprem maletg ad in museum. E cun 40 onns seigi el daventaus milliunari da Schillings. Perquei ch’il cuors dalla veglia muneida austriaca era fetg bass, manegia Christian Stock ch’el eri buca fetg rehs cun 40 onns.

L’artista Mari Otberg che cultivescha surtut la pictura figurativa ch’ei exponida ella la stiva dalla Terrassa deriva oriundamein dil mund dalla moda. Ella ha studegiau design da moda ed illustraziun en Tiaratudestga. Sco ella di sezza seigi quei stau ina experientscha impurtonta per ella. «Suenter plirs onns alla front sun jeu vegnida unfisa d’esser dunna da fatschenta ed hai decidiu da far ina midada.» Quei tonpli ch’igl art da picturar seigi adina staus ina occupaziun impurtonta per ella.

Maletgs ch’ein era sculpturas

Digl artist Christian Stock stat ei scret en ina broschura edida dalla Uniun d’art da Ruhr, ch’el malegi sculpturas. A Ladir ella Stalla sper la Terrassa presenta igl artist che ha era gia exponiu ella casa da Nietzsche a Segl picturas en pliras colurs sin grondas surfatschas. Ina en mellen fa la pareta d’in sulegl quadrat ch’ei sesviluppaus d’ina pintga surfatscha ad ina gronda.

Per mussar co la pictura daventa sculptura presenta Christian Stock in quadrel alv che para gl’emprem mument d’esser ina construcziun d’arschella. En verdad ha igl artist malegiau il cubus cun colurs d’acril sin teila da glin e schau crescher il verfel dad onn tier onn.

Il carstgaun cun tut sias fassettas

Las ovras da Mari Otberg exponidas ella Terrassa sefatschentan dil carstgaun cun tut sias fassettas, insufficienzas e deficits. E surtut culla tscherca dalla verdad e dil senn. Las ovras da Mari Otberg tractan dils vezis e dallas sabientschas dil mintgadi, mo era dalla carezia, dalla dolur e dalla tragica. A Ladir expona l’artista ch’ei naschida a Stuttgart picturas sut il tetel «Poppy treat» creadas cun rida dad ieli. Ella malegi buca mo persunas sco cheu, di Mari Otberg. «Jeu haiel era gia giu ina fasa ch’jeu haiel malegiau cuolms ni autras tematicas.» Ella hagi naginas claras finamiras. «Sco artista haiel jeu l’incumbensa da malegiar e da mussar mias ovras. Plascher havess jeu sche miu art survivess mei.» Sco tuttas artistas ed artists giavischi ella naturalmein che la glieud hagi plascher da ses maletgs.

Dieter Wittmann, il menader dalla Terrassa a Ladir ha manegiau en discuors cun la FMR ch’el seigi ventireivels d’haver gudignau dus artists da num per la premiera en sia Stalla ed el restaurant. Ils resuns a caschun dalla vernissascha seigien stai positivs.