200 skiunzas e skiunzs han fatg frunt all’aura burasclusa

Sin fundament dallas prognosas dall’aura savevan ils organisaturs dalla 15avla Trofea Péz che las cundiziuns duront las concurrenzas daventien pretensiusas cun neiv nova e vent. Tuttina ha la concurrenza verticala cun partenza spel Catrina Resort ed arrivada a Caischavedra saviu vegnir organisada tenor plan la sonda. Sin fundament dalla neiv nova ha la lingia dalla cuorsa individuala dalla dumengia denton stuiu vegnir adattada a cuorta vesta.

Cundiziuns fetg pretensiusas

Malgrad l’aura brutta e las cundiziuns giudicadas dafertontier han las concurrenzas saviu vegnir arranschadas. Il president dil comité d’organisaziun, Giochen Bearth, ei cuntents: «Las cundiziuns dall’aura ein stadas fetg pretensiusas, era per l’organisaziun. Per quei motiv essan nus satisfatgs ch’igl ei reussiu d’arranschar las cuorsas cun aschi biaras ed aschi biars participonts. Quei ei stau pusseivel grazia al grond engaschament dil comité d’organisaziun sco era da biaras e biars gidonters. Da nossa vart va era in grond cumpliment allas atletas ed als atlets ch’ein stai promts da concurrenzar da quell’aura pretensiusa e da procurar per cuorsas d’ault nivel.»  

La davosa caschun da semesirar

Sco quei ch’il comité d’organisaziun scriva en ina communicaziun als mieds da massa, ei la Trofea Péz Ault stada ina dallas davosas concurrenzas da turas da quest unviern. Biaras atletas e biars atlets han nezegiau la caschun da mussar lur buna fuorma per la fin dalla stagiun. Victur dil di dalla dumengia ei Marco Wildhaber da Tusaun daventaus. Cun 200 concurrentas e concurrents contonschan ils organisaturs dalla Trofea Péz Ault in niev record da participaziun.