Era il 3. Surselva Cup ei staus in success
La sonda vargada ha giu liug a Flem el Center Prau la Selva la tiarza ediziun dil Surselva Cup en trer rudialas. 16 teams per gronda part dalla Surselva mo era dalla Svizra Centrala e dalla regiun da Turitg han cumbattiu duront gl’entir di per la victoria.
Cun 24 puncts ha la Squadra 03 da Glion cun Fabian Frauenfelder, Roland Derungs, Erwin Hossmann e Claudio Montalta gudignau il Surselva Cup. Els quater han dominau il turnier. Sin plaz dus ei suandaus il team Ils locals da Schluein cun 23 puncts e sin plaz treis il Team Mundaun cun 22 puncts. La rangaziun ei vegnida fatga tenor las pli biaras victorias ed ils pli biars puncts suenter tut las scuntradas directas. Mintga giug ha cumpigliau quater rundas ed alternont ha mintga team giugau cunter tut ils auters teams.
Spel trer rudialas han ils participonts e las participontas era quest onn gudiu il star da cumpignia sco era da dar e survegnir buns tips davart lur disciplina da sport. Il restaurant dil Center Prau la Selva ha procurau per il beinstar dils teams duront las pausas ed era per la tscheina communabla.
Ils organisaturs miran anavos sin in turnier ch’ei gartegiaus e ha giu success. Cun 16 teams ei in team dapli staus dalla partida ch’avon in onn. La motivaziun per organisar la quarta ediziun dil Surselva Cup ei aschia avon maun, quei grazia agl interess dils participonts sco era al sustegn dils numerus sponsurs dalla regiun.
Gust da leger dapli?