Impedimaints da trafi
Easser atent e la ple impurtànta regla c’ign sto respectar, sch’ign e sen veia – segi quegl cugl auto, cugl velo near a pe. Quegl e betga me essenzial par la sirtad, ign observescha ascheia ear da tutas sorts situaziùns divertaintas.
Jou sund savens sen veia cugl e-bike, egn da quels dabots cun numbra melna. Quegl e igl mied ideal par la distànza da l’aglomeraziùn antocen igl martgieu da Basilea. Sen veia antop jou adigna puspe interessànts tips. Par exaimpel ve jou schon daple c’egn’eada fatg l’experienza c’egn velo da cursa vean aschi datier davo me, c’el savess gest aschi bagn sataner ved igl mieus portabagascha. Cun savundar talmeing e el protegieu digl vent a sa ascheia spargnear forza. Jou se me sameter avànt quànt stantus ca que sport sto easser, a pos cuvir ad el egna possa. Mo gest bùnas manieras e’gl tutegna betg. Tut savund la mi luna digl gi, porsch jou bugent que survetsch. Mo oters gis ve jou ear schon aposta ulzo igl mieus sustegn electric a ve semplameing scho anavos sulet igl pover ziclist – exponieu a tut igls elemaints.
Egn oter inscunter ve jou gieu cun egna ziclista ca eara sen veia plànsieu. Parquegl ve jou surpasso ella. Mo tier egna ampla cotschna, ca leva a leva betga midar sen verd, e ella tutegna puspe rivada suainter. Mo anstagl spitgear davo me, â ella stuieu sastruclar trànter me ad igls autos ad â saposiziuno gest davànt me. Ascheia ve jou alura, cur c’igl â mido sen verd, stgieu ir suainter ad ella cun tempo da glimaja antocen ca jou veva avunda spazi par puspe surpassar ella. Cun quegl c’igl dat sen quella veia blearas amplas cotschnas an curta distànza, vainsa alura ànc egn peer geadas repetieu que gioi. Jou creg dantànt betga c’ella veva anzuma registro me, tànt focusada eara ella sen saseza.
Egna ancunaschainta da me e adigna sen veia cugl velo. Da curt â ella manzuno c’ella stotgi sen veia savens sagritantar digls e-bikes. Qua ve jou natiralmeing gest gizo las ureglias. Ella â salamanto ca quels surpassian ella adigna a dovrian alura tier las amplas blear megna gi par puspe meter an movimaint lur vehicel, parquegl c’i midan betga an egn gir ple bass avànt ca taner eri. Ascheia va’gl alura vess da pedalar antocen c’ign â puspe sei daple tempo. Parquegl dund jou ussa ànc miglier adatg da meter aint egn gir bass tier egna ampla cotschna. Ascheia sund jou alura speart an movimaint cura c’ella mida sen verd a lasch davo me igls oters velozipedists – ad ear schon anqual auto.
Ear scha jou sund sen veia a pe, dat’igl adigna puspe situaziùns da trafi ca fan scurlar igl tgieu. Sco pedùnza dat an îl quànts autos ca fragnan betga, scha jou spetg avànt las strivlas melnas. Qua vasess jou egn’eada bugent ca la polizeia fagess controlas. Quegl fagess par me daple sen c’igl davos strof ca jou ve tgapo. Gliez eara sto parquegl ca jou ve egn peer secundas tanieu eri igl auto par schar ir or anzatgi noua ca quegl eara scumando. Nign carstgàn eara danturn, ca quegl vess savieu disturbar. Me la polizeia â observo tut or digl sieus auto, ca eara par cass ear agl scumond da safarmar, ad â alura tarmess igl quent da 140 fràncs egn peer gis ple tard.
Igl ple savens savilaint jou me digl trafi sco automobilista. Par exaimpel da velos a töfs ca ân igl santimaint ca las reglas da trafi valan betga par els. Oravànttut sen l’autostrada san’ign observar da tutas sorts manevers nuncapevels. Par exaimpel igls autos near camiùns ca bandùnan betga igl vial saniester, ân sei strusch novànta cura c’igl e atgnameing lubieu dad ir tschient.
Aschiprest c’ign sapartizipescha agl trafi, en las pussevladads da sagritantar nunlimitadas. Vut gir ca quegl e ear la situaziùn ideala par exerzitar ruassevladad a pazenztga. Ear sch’igl tùna forza betga ascheia, vi jou atgnameing betga easser egna parsùna ca sagritainta sur digl trafi. Surtut cun quegl ca jou sund seza siir ear schon stada la raschùn partge c’anzatgi oter â sagritanto. Ascheia amprov jou adigna puspe d’antschever igls meas vieadis cun egn stadi mental ruassevel a bagnvugliaint. Quegl va atgnameing gnànc schi mal, jou ve ànc darar sasantieu aschi bagn agl auto … Mo tge fa ussa que camiùn là davànt segl vial saniester?
Gust da leger dapli?