In questiunari da Viola Cadruvi
Dacurt hai jau survegnì in regal – in cudesch. Tgi che m’enconuscha bain, sa che quai n’è per il solit betg ina buna idea. La glieud ha adina il sentiment ch’i stuessan ma regalar «litteratura». Romans sur da dunnas, che van en clausura per chattar sasezzas, sur da relaziuns cumplitgadas tranter figlias e mammas, sur da migraziun, revoluziun, demoliziun, sur da feminissem, anarchissem, rassissem. Tut quellas -iuns e quels -issems pesants e grevs.
Sgarschaivel. Jau preferesch auters geners. Litteratura divertenta. Unterhaltungsliteratur. Escapissem. Mi’ultima revelaziun: Sarah J. Maas, Das Reich der sieben Höfe. En il rating da spicyness survegn l’ultim cudesch da la retscha 4,5 chilis da 5. Quai fiss la sort da cudeschs ch’ins stuess ma regalar. E betg «litteratura».
Mabain. Pia. Ultimamain ha insatgi tuttina gartegià in bun shot cun in regal litterar. Jau hai survegnì il cudesch cun il questiunari da Max Frisch. Ina rimnada da questiunaris tar temas sco amicizia, la lètg, patria ed umor. E tge bunas dumondas che quels cuntegnan. Natiralmain or d’ina vista fitg masculina, etero normativa, patriarcala, ma tuttina plain perlas sco: «Essas Vus segir, che Vus fissas interessads vi dal mantegniment da la carstgaunadad, sche Vus e tut Voss enconuschents na fissan betg pli?» ni era «Sche Vus essas en il exteriur e Vus entupais cumpatriots: Survegnis Vus lura encreschadetgna ni eba exact betg?».
Super dumondas per cumenzar in bun discurs cun tuttas sorts persunas. Jau hai gist testà quai cun mias amias ed igl ha funcziunà super bain. Dentant avain nus suenter in temp era cumenzà a sviluppar agens questiunaris. Ed intginas da quellas dumondas – quellas che nus avain giuditgà sco publitgablas – less jau parter qua cun vus. Libramain tenor Max Frisch:
Sche Vus fissas in gener da musica, tgenin fiss quai?
Tgenina ovra (film, chanzun, cudesch) ha influenzà Vus il pli fitg? Pertge?
Pertge giais Vus en la sauna? Ed ussa sincer?
As chastiais Vus mintgatant sez?
Datti per murdraretsch ina giustificaziun morala?
Sche Vus muris, tge duess capitar cun Vossas restanzas?
Sche Vus pudessas anc ina giada esser uffant, tge vulessas vulair reviver?
Tgenina mort supportais Vus plitost, quella da Vossa mamma ni quella da Voss bab?
A tgi vulessas Vus perdunar, ma na pudais betg?
Tge è ina reacziun adequata sin malfidaivladad en ina relaziun monogama?
Tge vegn tenor Vossa opiniun survalità?
Manegiais Vus, che Vus vegnis anc ad avair sex en la vegliadetgna? Cun tgi?
Tge outfit tschernissas Vus per ina party sexpositiva?
Savais Vus, tge ch’ina party sexpositiva è?
Tge quittais Vus attractiv vi da voss*a partenari*a?
Tge quittais Vus attractiv vi dad auters carstgauns?
Tgenin è Voss toc vestgadira preferì?
Tgenina chaussa en Vossa abitaziun para a Vus sgarschaivla? Pertge na dismettais betg ella?
Cartais Vus en tradiziuns? E sche gea, en tgeninas?
Gudognan scolast*as avunda?
Ha mintgin*a il dretg sin ina vita ventiraivla?
Gea, jau sai, il questiunari pudess ins anc optimar ed amplifitgar. Ed ins po natiralmain era sentir l’influenza da mia ultima lectura «nunlitterara», era sch’jau hai gia sortì ora las dumondas d’in spicyness-rating sur 2,5 chillis. Ma tuttina sper jau che las dumondas procurian per intginas discussiuns divertentas – saja quai durant gentar en fatschenta, durant la biera da saira sontga, durant la festa da famiglia ni, en il meglier cas, enta letg.
Gust da leger dapli?