Il luvratori communal duei vegnir engrondius

Dapi prest 20 onns ei la vischnaunca da Mustér affittadra da localitads pil menaschi tecnic el baghetg dil Departament federal dalla defensiun, protecziun dalla populaziun e sport (DDPS) a Cuoz. Leu nua che la Confederaziun occupa medemamein localitads per siu survetsch dil Commando Cyber (post da lavur Platta), ei era l’infrastructura dils Pumpiers Sursassiala. Ils davos onns ei semussau ch’ei drova dapli spazi pil menaschi tecnic che cumpeglia era il forestalesser ed ils pumpiers. Sin fundament da quels basegns ei il project d’extender il spazi per infrastructura vegnius lantschaus il matg 2025 dalla suprastonza communala. Il motiv che quei duei succeder leu ei che la vischnaunca dispona da quater parcellas che cunfineschan cun quella dalla Confederaziun. «En sesez essan nus en ina situaziun fetg confortabla a Cuoz pertuccont terren», di gerau Clemens Berther. Las quater parcellas han ina mesira 4780 meters quadrats.

Recuors ein liquidai

Il matg 2025 ei la procedura da submissiun per la lavur d’architectura da quei project succedida e sin fundament dallas offertas inoltradas ei quell’incarica vegnida surdada igl uost 2025. Retschiert l’incumbensa ha igl Atelier Schmidt GmbH. Encunter quella surdada ein dus recuors vegni inoltrai. «L’jamna vargada ha la Dertgira suprema dil cantun Grischun refusau ils recuors. Consequentamein exista ussa ina basa giuridica clara e definitiva», di gerau Clemens Berther. Il menaschi tecnic ei en siu departament e per quei motiv presidiescha el era la cumissiun da quei project. En quella cumissiun sesan era representants da tuts menaschis pertuccai ni interessai vid infrastructura a Cuoz. «Quei ein ils pumpiers che disponan leu da localitads, mo lu era la Corporaziun d’aua Spina da vin che tscherca localitads e la colonna d’agid che ha era basegns da spazi. Secapescha ch’il menaschi tecnic ed il forestalesser ein involvi. Il proxim temps vegnin nus era a menar discussiuns cul Spital regiunal Surselva. Tenor nies manegiar fuss Cuoz in liug central per infrastructura pil survetsch da salvament da quel», explichescha Clemens Berther.

Realisau 2029?

«Ils recuors han retardau il project per pressapauc in miez onn. Ussa sa la planisaziun denton entscheiver, aschia che nus quintein da saver presentar il project en in onn al pievel. Culla resalva ch’il credit vegni concedius dil suveran, savess la realisaziun entscheiver el decuors da 2027 e fuss lu terminada la fin 2029. Quei ei denton in scenari fetg optimistic», di Clemens Berther. Davart cuosts pusseivels vul el far neginas indicaziuns: «El decuors dalla planisaziun savein nus dapli. Ei dependa co nus savein realisar l’infrastructura. Savein nus extender igl existent ni drova ei baghetgs individuals supplementars.» Tenor Clemens Berther drova il menaschi tecnic e forestal dapli spazi pils vehichels, quei ch’ei il cass era tiels Pumpiers Sursassiala. En tgei fuorma e sut tgei cundiziuns che la Corporaziun d’aua Spina da vin, la colonna d’agid ed autras instituziuns vegnan involvidas semuossa ils proxims meins ella planisaziun. Medemamein duei vegnir sclariu da tgei varts ch’ei pudess dar subvenziuns cantunalas pil project.