Ün hotel scu «la villa dad ün ami stravagant»

La Bueno Bar da la Villa Beaulieu es sgiaglieda, ludicamaing nostalgica ed ho il flair da jugendstil dad ün grandhotel: paraids culuridas in verd s-chür, tendas greivas cotschnas, spievels pumpus cun culur d’or e s-chabels da chüram chi sun uschè cumadaivels chi nu’s vuless pü ster sü dad els. Immez quista chambra chi pera dad esser crudeda our dal temp, tschaintan duos homens giuvens. Mic Schneider e Martin Camichel, tuots duos da l’anneda 1994, d’eiran conscolars al Lyceum Alpinum Zuoz, pü tard haun els mno insembel la discoteca Vivai a San Murezzan ed ün’ustaria a S-charl. Zieva üna posa dal manaschi d’hotellaria vöglian els uossa realiser lur proget da cour: la Villa Beaulieu.

Inua cha paziaintas e paziaintas d’eiran fin d’utuon auncha i’ls lets dad amalos pernottaron bainbod giasts, inua chi’d es gnieu opero dessan avair lö festas, impè dad infusiuns do que uossa bun vin in chesa. L’edifizi da l’anteriura Clinica Gut a la Via Arona güst sper il Museum Berry es darcho plain vita. 

Inavous tar las rischs 

Oriundamaing d’eira la chesa gnida fabricheda scu Pension Villa Joos. I’ls ans 1920 ho la famiglia Planta cumpro la chesa e la druveda scu Villa Beaulieu per adöver privat. A parti da l’an 1941 es rechattaiva alura la Clinica Gut in quist edifizi. Pusiziuno ideelmaing, dacunter al center da la vschinauncha, cun vista directa sül lej as rechatta la chesa in ün lö fich attractiv. 

I’ls ultims quatter mais haun Mic Schneider e Martin Camichel durmi poch e lavuro fich bger. La mited d’october es gnieu suottascrit il contrat da fittaunza cun la famiglia Gut, fin la mited da december es gnida fundeda l’egna firma, organiso inscunters cun investuors e cumanzo a müder la funcziun dal stabilimaint.

Al mumaint ch’ella es gnida surpiglieda d’eira la chesa pronta per gnir sbudeda. «Nus vains stuvieu transferir da nouv tuot las lingias d’ova e tuot las lingias d’electricited, sburser bgers raps per accumplir las pretaisas da la pulizia da fö e renover las chambras», raquinta Mic Schneider. Els haun pudieu fer quint cul sustegn d’amihs e cuntschaints ed eir cun bgera bainvuglientscha da vart dals chantunais. La mobiglia deriva per granda part our dal fundus da Peter Robert Berry. Sets inters metta el a disposiziun als giuvens impressaris. Il scharm cha quista mobiglia ed ogets decorativs intermedieschan sun impajabels.

Propaganda a buocha

Il contrat da fittaunza es gnieu conclüt per quatter ans, cun opziun da prolunger quel. Davous ils duos impressaris giuvens sto ün collectiv da persunas da la regiun. Già daspö ils 26 december sun avierts la Bueno Bar ed üna butia da vin ed ils 29 december es gnieu aviert ün restorant pop-up cun cuschinunzs ospitants. Quel ho però üna funcziun be per gruppas e be sün postaziun. Our da las anteriuras selas d’operaziun ho que do üna sela d’events cun plazza per fin 80 persunas. Quella es già gnida druveda per üna festa da Silvester, düraunt la Crypto Finance Conference per events e per l’occurrenza d’art Nomad.

Fin uossa funcziuna il manaschi sainza reclama, ma cun propaganda e contacts a buocha. «Nus essans auncha illa fasa da test», declera Martin Camichel. Cha la spüerta da la Villa Beaulieu vegna ingrandida ed optimeda cuntinuedamaing. «Nus vains cò ün juvel, ma ad es auncha bger da fer», agiundscha Mic Schneider. Las 13 chambras – nouv chambras doblas e quatter suitas – paun gnir reservedas, cun culazchun inclusa, il pü bod a partir dal principi d’avrigl. Impü es que planiso da chatter uschè svelt scu pussibel ün gestiunari dal restorant.

Bgeras uras gratuitas

«Per nus es la Villa Beaulieu eir ün proget cumünaivel, nus vulains dvanter ün lö d’inscunter per tuots, per indigens e giasts», disch Mic Schneider. Cha tels lös da cumünaunza maunchan a San Murezzan. «Nus vulains esser ün lö d’ota qualited, inua cha que as oda eir üna vouta ün ‹Ueilà›», disch l’osp.

Bod 1500 meters quadrats inclusiv üert staun a disposiziun. Mincha sectur ho ün egen caracter e dess, tenor ils gestiunaris, sus-chair as müder cuntinuedamaing. «Nus vains grand interess per evenimaints e happenings in chesa», ho’l explicho pünavaunt. Tschertas surfatschas da detagl vegnan suotfittedas mais per mais, que do eir interessents per ün fit-chesa fix – ed ün interessent vuless piglier a fit l’intera chesa düraunt il november.

Eir üna residenza d’artists es planiseda

Ün punct centrel da la Villa Beaulieu es l’art. Già uossa es quella omnipreschainta illa chesa, ed in futur dessan artistas ed artists sus-chair expuoner cò lur ouvras. «Nus vulains installer üna ‹Artist in Residence›, per cha que detta constantamaing ün barat culturel in chesa», declera Martin Camichel. Dafatta düraunt la stagiun morta dessan persunas creativas gnir invidedas. Ün public in mera per la stagiun ota nun haun ils giuvens impressaris brich. «I dess esser scu la villa d’ün ami stravagant, inua cha que do persunas fich differentas», disch Mic Schneider.

Duos collavuratuors da da la bar, duos housekeepers, duos persunas in l’administraziun ed ils duos giuvens impressaris fuorman actuelmaing il team da collavuratuors da la Villa Beaulieu. A la dumanda, cu finanzier ün tel proget respuonda Mic Schneider: «Nus avains fich buns investuors chi ans laschan temp per realiser ün proget d’hotel fich captivant e flexibel.» E natürelmaing prastan ils duos idealists innumbrablas sururas na pajedas.

Fin d’avrigl di da las portas aviertas

La seguonda fasa da test cun l’hotellaria dess dürer fin la fin da la stagiun d’inviern. Pel principi d’avrigl es alura previs ün grand Opening, ün di da las portas aviertas. I’l meg do que auncha üna vouta üna pitschna fasa da müdeda ed il curtin vain preparo. «A partir da la sted vulains nus esser operativamaing activs in tuot ils sectuors», uscheja Mic Schneider. La Villa Beaulieu dess dvanter üna gestiun da tuot l’an.