La liunga via tier la cuorsa liunga
Ei l’Austria ina naziun da skis? Suenter ils giugs olimpics d’uonn sundel buca pli aschi segira. E suenter mias experientschas dalla fin d’jamna vargada aunc pli pauc.
Naturalmein, Vienna ei buca l’Austria. Ils skiunzs e las skiunzas sesanflan plitost el Tirol ni ella Steiermark, buca cheu ella bassa platta, nua ch’il pli ault punct ei il Hermannskogel cun 542 m s.m. Mo tenor las legendas urbanas sappien ins era ir cun skis a Vienna, meglier getg cun skis da cuorsa liunga. Las loipas sesanflien el Prater ni silla Donauinsel. Cu ei hagi avunda neiv, secapescha.
Pia essan nus selegrai sigl unviern ed havein spitgau. Silla neiv. Enstagl da serias sin Netflix mirava miu partenari regularmein atras tut las webcams dallas regiuns da cuorsa liunga el contuorn. Senza scuvierer gnanc ina tacca alva.
Igl onn vargau ei vargaus senza che nus havein viu neiv a Vienna. Uonn perencunter ha ei adina puspei bischau – mo la neiv svaneva cuort sissu entras aultas temperaturas ni plievgia. Bunamein havessen nus era scret giu quei unviern, mo lu, avon cuort, ha ei dau ina vera cuflada. E la webcam dad ina dallas regiuns el contuorn, il Wechsel, ha mussau: ina loipa preparada. Allas armas!
Quei ei stau il mument, cura ch’igl ei vegniu endamen a mi ch’jeu hai insumma buca skis da cuorsa liunga. Mo en ina naziun da skis sco l’Austria anfl’ins quels segiramein spert … Jeu sun semessa sin via.
Emprema stizun da sport, ina fatschenta specialisada: Pli u meins mo velos. Skis da cuorsa liunga sappien ei pustar tier filialas en autras regiuns, gi il vendider, mo cheu a Vienna seigien quels normalmein buca dumandai.
Secunda stizun da sport, ina gronda cadeina: Na, quei hagien ei buc, gi il vendider, mo jeu sappi forsa mirar en ina fatschenta tier il Westbahnhof, quels seigien specialisai sin turas da skis. Jeu hai engraziau e tertgau: Oha. Sch’in vendider da sport sa buca tener dapart cuorsa liunga e turas da skis, lu paran quei buca dad esser disciplinas popularas a Vienna.
Mia tscherca hai jeu dau si, denton buc il plan dad ir a far cuorsa liunga. Ins sa gie prender si skis el Wechsel. Dai, meinsa!
Mo co? – In auto havein nus era buc. Ed aschi bein sco il traffic public ei organisaus a Vienna, aschi schliet funcziunescha el el contuorn. Buc in bus che fuss ius tochen tier la loipa, ni mo schon damaneivel. Perquei havein nus decidiu da buca mo prender si ils skis, mo era in auto – per vegnir sissu che nossas lubientschas da manischar svizras valan buc en Austria. Sch’ins viva cheu pli ditg che sis meins, ston ins seregistrar per survegnir ina lubientscha austriaca.
Per cletg dat ei taxis, e raps per pagar il taxi, e temps ch’ins sa passentar ella metro ed el tren ed el bus tochen ch’ins ei tier il taxi. La fin finala havein nus propi saviu passentar in bi gi, ni silmeins in pèr uras, silla loipa.
Tuttina fuss jeu s’imaginada in tec auter in gi da skis en ina naziun da skis.
Gust da leger dapli?