Musica instrumentala per giuven e vegl

In sonda, ils 21 marz, ha lö il concert annual da la Società da musica Zernez. Las musicantas ed ils musicants preschaintan suot la direcziun da Flurin Lehner ün program varià cun musica per mincha gust: musica da film, classikers da pop, balladas, ritems fascinants e marchas plain schlantsch. Il concert in chasa da scoula a Zernez cumainza a las 20.00. Davo il concert invida la Società da musica Zernez, sco ch’ella scriva, a star ün pa da cumpagnia cun ustaria e musica. Al cumanzamaint da la sairada da concert a Zernez as preschainta eir la Musica da giuvenils La Plaiv Zernez suot la direcziun da Reto Lehner. Per las giuvnas musicantas ed ils giuvens musicants es quai be il pretact per üna lunga fin d’eivna da concert. In dumengia, ils 22 marz, concertescha nempe la Musica da giuvenils La Plaiv Zernez insembel culla Musica da Giuventüna Engiadina Bassa a Zernez e Ramosch. Il concert in dumengia a Zernez cumainza a las 10.30 in chasa da scoula. Davomezdi a las 15.00 segua lura il concert illa chasa da scoula a Ramosch. In seguit a quist concert ha lö eir üna stüva da cafè. Ils duos concerts in dumengia han lö suot la direcziun da Peter Blaas e da Reto Lehner.