Zuoz decida ils 8 d’avrigl

La suprastanza cumünela da Zuoz suottametta la decisiun a reguard la nouva structura pel provedimaint da sandet ill’Engiadin’Ota Sanadura, güst zieva Pasqua a la radunanza cumünela. Da decider ho la populaziun davart il contrat da cunvegna cun la Sanadura e las cunvegnas da prestaziun culla Spitex e las duas chesas da chüra. Scu que cha’l president cumünel, Romeo Cusini, ho infurmo a RTR hegia lö ils 8 d’avrigl üna radunanza cumünela in chosa. Quai zieva cha la vschinauncha avaiva spusto la radunanza cumünela dals 4 da marz, causa manchaunza d’infurmaziuns fundedas davart ils progets da votaziun. Culla decisiun da la vschinauncha da Zuoz haun alura tuot las ündesch vschinaunchas da l’Engiadin’Ota decis davart lur provedimaint da sandet futur illa regiun.