Fatschas encunter il rassissem

L’exposiziun da portrets «Miu plaz preferiu» ch’ei da veser entochen ils 12 d’avrel 2026 el zuler dalla claustra a Mustér ei vegnida arranschada el rom dall’jamna d’acziun encunter rassissem (16 entochen 22 da mars 2026). «Nus essan vegni dumandai dil Cantun schebein nus havessen interess da separticipar a quella e havein dau suatientscha», di Dorothee Pujol. Ella meina il post da migraziun tier la Crusch Cotschna Svizra Grischun. Ella ei denton era fotografa. Aschia ha ella cumbinau las duas activitads ed il resultat ei in’exposiziun cun 19 portrets. Las fotos muossan sis persunas indigenas, sis d’ordeifer ch’ein secasadas en vischnaunca e siat persunas cun dimora el center per requirents d’asil Bellavista a Mustér. Ellas muossan lur plazs preferi. Accumpignadas vegnan las fotos en alv e ner da cuorts texts dallas portretadas e dils portretai. En tudestg, romontsch e lur lungatg mumma descrivan els lur plazs preferi a Mustér.

In tema omnipresent

«Rassissem ei aschidadir in tema omnipresent en nies mintgadi», di Dorothee Pujol ch’ei Turitgesa, mo che viva dapi 30 onns el Grischun: «Cun quell’exposiziun vi jeu mussar fatschas ed aschia empustir relaziuns. Jeu vi mussar ch’ei dat a Mustér las pli differentas persunas e che tuttas han in plaz leu.» Las persunas portretadas ein vegnidas eligidas pli u meins tenor casualitad, mo tuttina culla finamira da mussar il spectrum digl origin dad ellas. Treis dis ha Dorothee Pujol fotografau e la fin finala ei sedada in’exposiziun cun dabia veta: «Jeu hai fatg las fotos en colur, mo enten elavurar ellas sun jeu sedecidida da mussar ellas en alv e ner. Tenor miu manegiar viva il caracter dalla fatscha meglier aschia.» La mesjamna vargada ei l’exposiziun vegnida aviarta, biaras e biars portretai ein separticipai a quella.

19 historias

«19 fatschas – 19 historias. Communablamein muossan ellas enzatgei essenzial: La varietad viva era en in vitg sco Mustér. Mintgina e mintgin ha siu plaz», di Diego Deplazes. Il meinafatschenta dalla Crusch Cotschna Svizra Grischun ha aviert l’exposiziun «Miu plaz preferiu». Entgins portretai hagien eligiu persuenter in liug bein enconuschent, auters in plaz plitost empau anonim. «Era els texts accumpignonts semuossa la varietad dils portretai. Mintgina e mintgin muossa si’identitad, sia patria e sia relaziun cun Mustér», di Diego Deplazes. L’exposiziun el dueigi esser in accent alla varietad, il respect e la cohesiun en vischnaunca. En quei senn dueigi l’exposiziun esser in liug da sentupada e da vegnir en discuors in cun l’auter. «Ella duei era porscher la caschun d’emprender in da l’auter», accentuescha Diego Deplazes.

Buca per casualitad en claustra

Che l’exposiziun dils portrets ei da veser el zuler dalla claustra da Mustér, ei buc ina casualitad. «Cul gimnasi havein nus collaborau pliras ga culla Crusch Cotschna Svizra Grischun il davos temps. Scolaras e scolars da nus ein stai involvi en projects cun requirents d’asil», di pader Paul Tobler. El seigi impressiunaus digl engaschament dalla Crusch Cotschna Svizra Grischun encunter il rassissem. Portretai ell’exposiziun ein era dus scolars dil gimnasi ed in pader dalla claustra. «Al gimnasi havein nus scolaras e scolars da differentas naziuns. Nus essan aschidadir intercontinentals. Leu setschenta la damonda, daco ch’enzatgi ei cheu, era buc. Nus lein la pasch e ch’ei mondi bein cun tuts», di pader Paul Tobler. Ils Benedictins seigien enconuschents per lur hospitalitad.