Grev accident – dunna morta e  mattatschas blessadas

Il venderdis avonmiezdi ha in grev accident el vitg da Sedrun pretendiu in’unfrenda mortala e duas persunas miez entochen grev blessadas. In manischunz d’in auto ha sbagliau il pedal da gas cul frein.

Sco quei che la Polizia cantunala dil Grischun scriva en ina communicaziun als mieds da massa ei igl accident el vitg da Sedrun capitaus il venderdis cuort avon las 10.00. Tenor empremas enconuschientschas ha in um ella vegliadetgna da 87 onns sbagliau il pedal da gas cul frein da siu auto sin ina via da quatier. Igl auto accelerau ha tschaffau quater persunas d’in camp da scolaras e scolars cun persunas accumpignontas.

La dunna ei morta el liug

Ina dunna ella vegliadetgna da 47 onns ei vegnida blessada talmein ch’ella ei morta aunc el liug digl accident. Duas mattatschas ella vegliadetgna da 13 onns ein vegnidas blessadas miez entochen grev. Suenter ch’ellas ein vegnidas tgiradas da tiarzas persunas, dus teams dil Survetsch da salvament Surselva e da duas equipas dalla Rega, ein ellas vegnidas sguladas el Spital cantunal dil Grischun respectivamein el Spital cantunal da Lucerna. In mattatsch ei vegnius blessaus levamein. El ei vegnius tractaus ambulontamein. Il Care Team Grischun ha susteniu las ulteriuras persunas dalla gruppa. Stai engaschai ein era ils Pumpiers Sursassiala. Sut la direcziun dalla Procura publica dil Grischun eruescha la Polizia cantunala dil Grischun las circumstanzias che han menau a quei grev accident.