L’erupziun digl gliendisdis
Christof ei beingleiti dapi 15 onns scolast da classa. Ad el eis ei buca mo impurtont da tematisar e sensibilisar ils scolars e las scolaras per temas d’ambient e da convivenza. El viva igl bien exempel. El fa stem da ses fastitgs ecologics, legia cun precauziun il carnet da votar e gendrescha ch’ins magari tema che la lieunga sezugli en in nuv. Tut quei gartegia ad el senza esser in cumpogn stentus. Senza cuorer da cantun a cantun cul det d’admoniziun. Senza perdegar sc’in apiestel ad auters ed autras siu stil da viver. Siu stil da viver dat pér en egl, sch’ins enconuscha el gia pli ditg.
Ton pli ein ins lu denton in tec irritaus da sia reacziun igl gliendisdis endamaun, sche siu club da ballapei preferiu ha spiars. Lu sesa el numnadamein ella stanza da scolasts e tschaduna sia muosa da quinoa ed aveina ord la meliera. Igl bien exempel fa lu cuort vacanzas – ed igl entir frust dalla fin d’jamna vargada rumpa ora en in tschallat d’aviras. Al niev trenader attestescha el ina reducziun da si’abilitad spirtala («Quel ha dau tier GC!»), allas mummas digl adversari accusescha el da persequitar professiunalmein in mistregn el sectur d’erotica ed ils fans hospitonts cumpareglia el pliras gadas ed en cuorta successiun cun divers animals da nez (savens tgauns, magari pors, darar asens).
Igl ei mintga gada in cuort fenomen. Ei cuoza adina circa aschi ditg sc’in pugn rachetas igl emprem d’uost. Cuort, intensiv denton dètg spectacular. Jeu selegrel perquei schon silla proxima gada, silla proxima erupziun digl gliendisdis, denter quinoa ed aveina.
Gust da leger dapli?