Suenter 35 onns prenda Flurin Camenisch cumià

Suenter che Flurin Camenisch ha finì ses studi da biologia, ha el sco emprim cumenzà a lavurar sco scolast secundar. Cun 30 onns ha el lura surpiglià la plazza sco zoolog e pedagog en il Museum da la natira dal Grischun a Cuira. Quella plazza era vegnida stgaffida nov dal Chantun. Flurin Camenisch è damai stà l’emprima persuna ch’ha fatg questa lavur.

«Jau hai al cumenzament stuì crescher en quella lavur. Jau hai lavurà a l’entschatta cun giuvenils e tuttenina era il public scolinas. L’emprim mument hai jau pensà: Tge fatsch jau cun quels pitschens? Oz èsi ina gronda fascinaziun da lavurar cun pitschens e gronds. Mintga classa è autra», ha raquintà Flurin Camenisch envers RTR.

Nov capitel da la pensiun

En il museum ha Flurin Camenisch lavurà surtut en l’intermediaziun. El ha manà classas da scola tras il museum, ha fatg guidas per persunas creschidas e famiglias ed ha organisà eveniments. El ha declerà animals, spazis da viver e connex en la natira, e quai adina en moda simpla, visibla e cun grond entusiassem. En tut quels onns ha el ramassà blers bels e leghers muments: «Mintga giada datti novas situaziuns, dumondas u era respostas, tar las qualas ch’ins pensa: Mamma mia, quai è uschè bel.»

Ses temp sco zoolog e pedagog en il Museum da la natira a Cuira va suenter 35 onns la fin d’avrigl 2026 a fin, ma la fascinaziun per la natira e per ils animals resta probabel per adina. Lungurus na daventa il nov capitel da la pensiun damai segir betg per Flurin Camenisch: «Jau poss ir sin in prà e poss star là in mez di, e quai è per mai grond divertiment.» Ed er en il museum vai vinavant. La successura per Flurin Camenisch è gia fixada. Quella persuna cumenzà lura il settember 2026.