Las pendicularas da Breil drovan raps

Ina gada dapli han ils acziunaris principals – la Anavon SA – dau igl atun vargau 1,5 milliuns francs per garantir il menaschi d’unviern 2025/26 dallas pendicularas Breil Vuorz Andiast. Era quest unviern hai denton buca funcziunau cun far reservas.

Problems finanzials ed investiziuns

Las pendicularas stattan avon in problem structural. En ina stagiun da skis che cuoza mo treis meins eis ei grev da far bunas fatschentas. Vitier vegn la munconza da neiv. Entras quella drovi neiv artificiala e lezza caschuna cuosts supplementars. Tenor il president da las pendicularas Hansueli Baier ei la stagiun vargada, ch’ei gest ida a fin la fin d’jamna, stada la pli greva dils davos onns. Avon il bancrut seigien las pendicularas denton aunc buca, di il president. «Igl atun vargau eis ei stau critic. Lu vegnevan nus buca pli da pagar ils quens. Quei havein nus denton dumignau ed ussa vai ensiviars. Nus essan ussa denton dumandai d’anflar ina sligiaziun pil futur.»

La bunaveglia ei cheu

Hansueli Baier ei perschuadius ch’ins vegni ad anflar ina sligiaziun: «La bunaveglia ei cheu da tuttas varts. L’existenza dallas pendicularas ei buca periclitada.» Il futur dallas pendicularas dependi denton dil sustegn finanzial. Culla damonda da cattar ina sligiaziun manegia el era eventuals novs investurs. «Nus duvrein fetg biars daners ils proxims onns per curclar nos basegns. Quels daners vegnan buca dallas bancas. Lezzas dattan buca raps a nus » Ei stoppi dar autras vias che portien novs raps, di il president dil cussegl d’administraziun. «Jeu discuorel da milliuns en summa da duas cefras che nus duvrein per cuvierer nos basegns. Senza igl agid dalla vischnaunca vegn quei buca a funcziunar.»

Actualmein s’auda la gronda part dallas aczias dallas pendicularas alla societad Anavon cun 22 acziunaris. Quei ein denter auter interpresas localas sco era possessuras e possessurs da secundas habitaziuns. Ils davos diesch onns han ils acziunaris investiu biebein nov milliuns francs per segirar il menaschi.

La vischnaunca politica

Il proxim adressat per susteniment finanzial per las pendicularas Breil Vuorz Andiast ei la vischnaunca politica. Cons milliuns ch’ei drovi lura effectiv, dependi da las investiziuns ch’ins vegli far ils proxims onns el territori da skis, di Hansueli Baier. «In’opziun pusseivla ei da construir ina nova pendiculara che meina directamein da Breil sin l’Alp Dado. Ina tala pendiculara ei denton in project da generaziuns. Cheu discurrin nus da denter 30 e 40 milliuns francs.» In tal project vegni era amortisaus en in interval da plirs decennis, di il president. Quella situaziun daventi pli ditg e pli fetg supportabla per las pendicularas ord il pugn da vesta dallas finanzas. Mo el mument seigi ei ina fetg gronda sfida.

«Senza il sustegn dalla vischnaunca vegn ei buca pli a funcziunar cullas pendicularas», di Hansueli Baier. «Nun ch’ei detti ina miracla ed ins anfli in investur che di ch’el vegli far tut sez. Mo in tal investur lavura buca cun la finamira da rendita, mobein quel posseda las pendicularas per siu agen plascher.» Ella medema crena sco il president dallas pendicularas dat era il turisticher indigen da Breil Marcel Friberg. Enviers la FMR ha el detg all’entschatta fevrer ch’ei drovi ussa in stausch da forza ed in pass curaschus per salvar las pendicularas. Schiglioc seigi ei meglier da calar ton pli spert cun tut.

Muntada pils treis vitgs

Hansueli Baier di che, sch’el fussi veramein perschuadius che las pendicularas hagien negin avegnir, lu astgassi ins buca pli reeleger el sco president dil cussegl d’administraziun. «Nossas pendicularas han ina gronda muntada pils treis vitgs Breil, Vuorz ed Andiast. Ils hosps che vegnan dapi onns cheu en vacanzas spetgan che nossas pendicularas seigien aviartas silmeins quels treis meins d’unviern.» E perquei seigi ins vid encurir ina sligiaziun.

Roman Flepp, il president communal dalla vischnaunca da Breil, di ch’el seigi promts da porscher maun per discutar il futur dallas pendicularas e per anflar ina sligiaziun. Prioritad hagi ussa denton da sanar las finanzas. Pér en in secund pass sappi ins lu discutar davart investiziuns pli grondas.