233 famiglias sin pista

Dumengia han las pendicularas da Sursaissa Mundaun ed il Club da skis Sursaissa envidau ad in’occurrenza naziunala per famiglias. Quellas havevan saviu s’annunziar pil «Migros Ski Day». Igl ei ina purschida ella neiv da primavera che la sponsura principala offerescha a cundiziuns specialas a ses commembers. Rivella, ils mazlers svizzers e l’organisaziun naziunala Swiss Ski ein co-sponsurs dall’occurrenza e contribueschan cun diversas attracziuns. En tut dat ei mintg’unviern 18 tals dis d’acziun en 13 destinaziuns dall’entira Svizra. Sco quei che las Pendicularas Sursaissa Mundaun scrivan en ina communicaziun, han 233 famiglias priu part al «Migros Ski Day» da dumengia vargada. En gruppas da treis, quater ni tschun ein pign e grond semess la damaun ella colonna per seschar menar siadora e guder las pistas dil territori da skis. Tgi che ha vuliu, ha saviu separticipar ad ina cuorsa ni absolver lecziuns gratuitas culs scolasts dallas scolas da skis Sursaissa, Lumnezia e Mundaun. Il suentermiezdi ei il chor d’affons «Singvögel» sepresentaus silla tribuna da fiasta a Misanenga. Inclus ella purschida ei il gentar staus. Las famiglias ein returnadas a casa cun divers schenghetgs ed ina regurdientscha dil di da skis.