Acceptau il credit per la concurrenza da project a Cons

La suprastonza communala da Mustér ha schau studegiar las pusseivladads da sanar l’infrastructura dalla scola populara a Cons. Quei studi vegn alla conclusiun ch’in baghetg da scola niev cuosta buca dapli che da sanar la casa da scola baghegiada 1980. Lezza ha numnadamein da basegns d’ina sanaziun. En mira ei era ina sanaziun dalla casa da scola veglia.

Concediu 380 000 francs

Il gliendisdis sera ei il cussegl da vischnaunca vegnius confruntaus cul project. El ha decidiu unanimamein da conceder in credit da 380 000 francs per ina concurrenza da project pil svilup digl areal da scola a Cons. La primavera 2027 duessen il planisader ed il preproject esser enconuschents. Silsuenter vegn il preproject surluvraus, aschia che la damonda da credit per la planisaziun en detagl e per la realisaziun sa vegnir tractada dil cussegl da vischnaunca igl atun 2027. La votaziun all’urna havess lu liug igl emprem quartal 2028. Ils cuosts totals pigl emprem project parzial cun in baghetg da scola per la scola populara semovan tenor studi denter 12 e 15 milliuns francs. Il conclus vegn suttamess al referendum facultativ.

Patinera ei en in schliet stan

Il parlament communal da Mustér ha approbau la revisiun parziala dalla lescha da scola. Quella ei vegnida adattada alla nova lescha cantunala da scola. Medemamein ha il cussegl da vischnaunca fatg adattaziuns dallas cumpetenzas e responsabladads en connex cul niev uorden da fatschentas per la suprastonza communala e per l’organisaziun operativa dalla vischnaunca. Il cussegl ei vegnius orientaus dalla suprastonza communala davart la patinera dil Center Fontauna. Quella sesanfla en in schliet stan e basegna ina sanaziun. Sco la suprastonza communala scriva en ina communicaziun als mieds da massa, ha in’interpresa specialisada presentau ina survesta d’entginas variantas per saver mantener la patinera. La fatschenta persuenter vegn preparada per tractaziun ad ina dallas proximas sedutas dil cussegl da vischnaunca.