Chor, crimi e Castrisch

«Buca tradescha lu damemia!», ha la dirigenta supplicau. «Secapescha buc», ha il redactur dalla FMR empermess. En quei senn duess la prevista dil concert da siu chor esser limitada – denton tuttina svegliar las marveglias. Avon biars onns ha Andrea Veraguth surpriu, sco giuvna scolasta, il Chor mischedau Castrisch. Cun quel ha ella presentau numerus concerts primavauns ella halla dalla casa da scola. Savens eis ei stau in communabel. Inagada ei il chor viril Sagogn vegnius sul Rein, inagada il chor viril Cant-itu-Landa en da Glion, biars onns pli tard il Chor mischedau Vrin/Surin. Romantic e variont eis ei stau il 2013 cul Chor romontsch dalla scola cantunala. Il Chor mischedau da Castrisch ei enconuschents per sia variaziun e sias ideas creativas.

 Mo otg canzuns?

Seigi melodias dad Angelo Branduardi, Yves Duteil, Flavio Bundi ni Alexi Nay: Igl ei regurdientschas en connex cun concerts dil Chor mischedau da Castrisch. Uonn duess ei dar in format niev – igl ei ina surpresa – e quei sonda, ils 11 d’avrel 2026. «Nus dein l’emprema gada in secund concert, e quei la dumengia suentermiezgi», ha Nina Caveng, la presidenta dil chor, rendiu attent a caschun dalla viseta ad in exercezi. Sco la dirigenta ha era ella supplicau dad esser discrets cun communicar detagls. L’uatga da gliendisgis vargau ad in’emprova, ella sala dil luvratori communal, ei perinagada empermettonta. Sil program ein otg canzuns. «Mo otg canzuns?», pudess ins manegiar. Il program dil concert dat spazi a quellas, denton aunc ad enzatgei auter. La dirigenta Andrea Veraguth ha numnadamein cumbinau il concert cun ina inscenaziun.

Aposta per siu chor ha Andrea Veraguth scret in crimi. Sco el titel da questa prevista san ins tradir il cuntegn cun treis plaids: chor, crimi e Castrisch – e buca dapli. Moh, forsa in techet dapli: Las canzuns s’accordan cun quei che schabegia duront il concert. All’entschatta, duront ed alla fin sepresenta il chor sco unitad, las cantaduras ed ils cantadurs selegran e sepresentan sco unitad e da buna cumpignia. Sch’in chor va sin viadi, dat ei bia da rir e da sedivertir. Denton lu, amiez quei viadi, miera in cantadur. Il collega Pieder Cantieni tuorna buca pli a Castrisch. La polizia emprova d’eruir tgei ch’ei veramein schabegiau e tgi ch’ei la cuolpa. Ei dat supposiziuns ed aversiuns vegnan neunavon. Gl’auditori sa prender part ad in viadi dil Chor mischedau da Castrisch empau agitau. Sascha Tischhauser moderescha la sera da tensiun. Zatgei seigi garantiu: Negin sto ir a concert cun in plumatsch per sezuppar dil snuezi, il concert ei in divertiment ed ina canzun suren dat ei segir era.