La biblioteca sco eldorado da giugs

A Glion envida la biblioteca communala e da scola ch’ei domiciliada el marcau vegl da passentar il di da sonda proxima denter las 10.00 e las 17.00 cun dar giugs e sedivertir. Tier l’offerta per affons e carschi che vegn purschida dalla Ludoteca da Glion s’audan il velo da polizia, il Pony Cycle ni ch’ins sa era baghegiar hettas. Pinai per duvrar ein plinavon ina meisa da ballapei, in flipper, pistas da ballas, giugs da tablas e da cartas ed autras surpresas. Magdalen Pfister, la menadra dalla biblioteca da Glion, accentuescha ch’il di da giugs en biblioteca seigi ina buna caschun da far attenta la populaziun alla biblioteca. «Nus e las collaboraturas dalla ludoteca ch’ein era presentas vulan cun quella caschun presentar nossa purschida per tuttas vegliadetgnas naven d’affons pigns entochen als carschi.»

Il tierz liug

Tenor la communicaziun da medias da la Bibliosuisse, l’uniun tetgala svizra dallas bibliotecas, ei il Biblioweekend dapi tschun onns ina fin d’jamna che duei mussar che las bibliotecas ein acturas impurtontas ella societad svizra. Magdalen Pfister dalla biblioteca dalla vischnaunca dad Ilanz/Glion discuora dil tierz liug. «La biblioteca ei quei liug sper il da casa ed il restaurant nua ch’ins sa passentar temps senza stuer mirar sill’ura. Ei dat aunc biara glieud ch’ei aunc mai stada en biblioteca e tut quellas e quels vulessen nus animar da prender la caschun da vegnir tier nus sonda proxima e da seperschuader da nossa purschida.»

Dar giugs

Per realisar il motto digl eldorado da giugs ha la biblioteca da Glion tschercau la collaboraziun culla ludoteca da Glion. «Da cuminonza transfigurein nus la biblioteca en in paradis da giugar. E nus vulein integrar ton ils affons da tuttas vegliadetgnas sco era ils carschi», declara Magdalen Pfister. Secapescha che las purschidas usitadas dalla biblioteca stettien era a disposiziun. «Nus e las collaboraturas dalla ludoteca essan cheu per dar sclariments davart la biblioteca e la ludoteca. E per tut tgi che ha tschaffen havein nus semtgau petta e caffè.»

In liug per ina e scadin

«Ina finamira da nies eldorado da giugs da sonda proxima ei era da mussar allas visitadras ed als visitaders che la biblioteca ei in liug sempel e ch’ins sto buca esser ina ni in magliacudischs», di Magdalen Pfister. La biblioteca seigi in liug da cultura e da formaziun. «Ins astga era semplamein entrar e star cheu cun nus.» Sper las funcziuns culturalas, politicas e socialas adempleschien las bibliotecas cun lur vasts secturs d’activitads era la promoziun dalla lectura ed il sustegn da la cumpetenza da medias e dil perfecziunament, scriva Bibliosuisse. Quei seigi bein motiv avunda da dedicar ina fin d’jamna per onn allas bibliotecas.

Glion e Mustér

Sper la biblioteca da Glion separticipeschan aunc otg bibliotecas dil Grischun al Biblioweekend 2026. Quei ein secapescha las grondas instituziuns sco las bibliotecas da Cuera, Tavau e la Biblioteca engiadinaisa a Segl. Mo era duas bibliotecas dil Grischun talian separticipeschan. En in auter rom porscha era la biblioteca da Mustér in eveniment, e quei cun ina sera da tandem da leger che ha liug il venderdis proxim dallas 18.30 tochen las 20.00.