Rir ensemen

La sexualitad en la tgira ei savens in tema da tabu – buc exnum tier il persunal, mobein plitost en general.

Ils basegns dils carstgauns ein differents e semidan en il decuors dalla veta. Denton restan ils sentiments ed era plirs basegns sexuals independentamein dalla vegliadetgna. Quei ei fetg individual. En il sectur da tgira vesel jeu en quei grau situaziuns differentas: naven da gronda distanza (forsa pervia d’in trauma da pli baul) tochen tier s’inamurar, flirtar ed ina damonda da maridaglia cun 95 onns. Ei dat diltut.

La vart meins biala ei quella, sch’il persunal da tgira (feminin ni masculin) vegn mulestaus. Quei sa capitar verbalmein ni entras tuccar en. Gliez vegn buca tolerau. Capeta enzatgei aschia, stat a disposiziun sustegn ed agid.

E lu dat ei la vart legra. Lezza succeda regularmein e disturba insumma buca mei. Ina remarca che indichescha la sexualitad croda magari duront la tgira, en moda e maniera fetg innocenta e senza in patratg zuppau. Tals exempels savess jeu raquintar biars. Els ein divertents ed jeu sai buc evitar in surrir.

Jeu patratgel en quei connex per exempel vid in cussadent che drova adina dapli tgira. Quei ei buc sempel per el. Jeu gidel a trer en ils calzers e silsuenter va igl um attempau sin tualetta.

Leu emprova el dad arver il nuv dallas caultschas. Adumbatten! Sia motorica fina ei sminuida. «Astg’jeu gidar?», damond jeu il cussadent. «Bugen», rispunda lez. Jeu arvel il nuv e tilel giu plaunsiu sias caultschas. Il cussadent ri e di: «Igl ei gia ditg vargau ch’ina dunna arva mias caultschas.» Nus mirein in sin l’auter e riein.

Dacuort ina situaziun semeglionta. Jeu entrel ella combra dad in cussadent per dar ad el in’injecziun. Cura ch’jeu damondel, sch’jeu astgel trer giu in tec las caultschas per far liber il venter, di el: «Gie, naturalmein.» Duront ch’jeu injecteschel il medicament marmugna il cussadent riend: «Sche Vus leis, saveis era trer plinengiu mias caultschas.» Jeu surriel. Aunc avon ch’jeu sai reagar mira el seriusamein sin mei e di: «Quei ei ussa stau tup da mei! Perdunei!»

Jeu sai che quei cussadent ha in humor fin. Aschia rispundel jeu ad el, ch’jeu quetel quei plitost legher – e nus riein ensemen. – Con bi da saver rir in cun l’auter. Era davart la sexualitad.

Madleina Manetsch lavura sco ­responsabla per la furmaziun professiunala en in center da sanadad a Männedorf. Ella è mamma e viva cun sia famiglia al Lai da Turitg.