Cumünaivelmaing da S-chanf fin a la Costa del Sol

Daspö plüs ons collavuran las societats da musica da giuvenils da La Plaiv/Zernez e da l’Engiadina Bassa. Sco uniun han las giuvnas musicantas ed ils giuvens musicants tut part cun success per exaimpel l’on passà a las Festa da musica ad Einsiedeln. Eir quist on ha cuntinuà la collavuraziun cul böt da preschantar ün concert da prümavaira in cumünanza. Quist mumaint es stat in dumengia passada cun ün concert avantmezdi a Zernez ed ün concert davomezdi a Ramosch.

Far musica cumünaivelmaing

Suot la bachetta da Reto Lehner, dirigent da la Musica da giuvenils La Plaiv/Zernez, e Peter Blaas, dirigent da la Musica da Giuventüna Engiadina Bassa, han las musicantas e musicants da Puntraschigna fin Martina preschantà ün bel püschel musical da prümavaira cun melodias in tuot las direcziuns. Ouravant a la part cumünaivla ha mincha singula società sunà duos tocs dapersai. Cha l’uniun fa la forza eir i’l sectur musical han las duos societats muossà impreschiunantamaing. A Zernez ed a Ramosch es la sala polivalenta statta bain occupada. Davo il concert a Ramosch ha gnü lö amo üna stüva da cafè.

Da S-chanf fin a la Costa del Sol

Il recept da success es cuntschaint: Mincha società singula imprenda il repertori independentamaing, minchatant han lura lö prouvas da musica cumünaivlas. Avant trais eivnas ha eir amo gnü lö dürant duos dis ün chomp da musica cumünaivel illas localitats da la Flab a S-chanf per glimar ils detagls e finalisar las chanzuns pels duos concerts. Cha quists chomps da musica hajan eir il böt da motivar ed intensivar l’amicizcha tanter las musicantas ed ils musicants da tuot l’Engiadina, han dit ils dirigents. Il resultat da quista lavur intensiva da tuot inviern han Peter Blaas e Reto Lehner preschantà cun melodias tradiziunalas, cun chanzuns da rock e jazz, ma eir cun sömmis da l’Irlanda fin illa Costa del Sol.