Gl’Uvriu ei carschius
Avon 20 onns han ils da Danis-Tavanasa priu in impurtont conclus pertuccont la cultura locala: Dus chors dils vischinadis han decidiu da sesligiar per far plaz ad in niev: Ils 8 da settember 2006 ei stada la radunonza da fundaziun dil Chor mischedau Uvriu Danis-Tavanasa. Siu giubileum festivescha quel actualmein cun ina turnea da concerts.
«Nies cant viva e quei vulein nus era purtar ellas casadas», ha Daniela Hefti-Cavigelli getg en discuors culla FMR. Ella ei ina dallas cantaduras ch’ei dapi l’entschatta commembra dil Chor Uvriu Danis-Tavanasa. Pia dapi ils 8 da settember 2006. Lu ei quella nova formaziun naschida. Ina notizia ella gasetta LQ ha publicau quei: «Questa sera allas siat s’entaupan ils commembers dils dus chors dil vitg per decider l’aboliziun formala dallas uniuns. Allas 20.00 ha liug la radunonza da fundaziun dil Chor Uvriu Danis-Tavanasa». Il chor-baselgia haveva priu siu conclus final ell’ustria dalla Staziun ed ils commember dil chor mischedau ell’ustria Steila.
20 onns activs
Uonn, il 2026, ei il chor niev minorens. E quei tierm da 20 onns festivescha il Chor Uvriu Danis-Tavanasa. Actualmein dumbra el 31 cantaduras e cantadurs. «Cul cant sacral a fiastas ecclesiasticas e profanas ademplescha el in grond pensum cultural», san ins leger ella broschura ch’ei cumparida pil giubileum da 20 onns. En siu logo d’uniun ha il Chor Uvriu in glogn. Els vegnien dumandau aunc savens tgei che quei «Uvriu» munti, raquenta Daniela Hefti. Ella ei carschida si a Danis e sa secapescha ch’igl uvriu ei gl’uaul da feglia che s’extenda dado il vitg. En quei uaul dominescha il ruver ed in uaul da ruvers senumna per romontsch «uvriu».
Quell’expressiun ei gest schi originala e creativa sco il chor sez. Quels 20 onns ch’el exista eis el staus activs. Naven dall’entschatta ha Daniel Pally surpriu la bitgetta. Igl onn giubilar eis el aunc adina responsabels per la part musicala. Il chor frestg ed innovativ ei separticipaus gia 2007 alla fiasta da cant districtuala a Domat. El decuors dils onns ha el mussau sias differentas varts e qualitads cun ina messa da jazz, cun schlaghers tudestgs ed arranschaments da canzuns da cantauturs romontschs.
La turnea
Igl onn 2013 ha il Chor Uvriu Danis-Tavanasa ediu in disc cumpact e pil giubileum da diesch onns inscenau il musical digl Ursin. Albert Spescha haveva fatg la musica tenor ils plaids da Gion Cadieli. Siu plascher dil cant muossa il Chor Uvriu adina danovamein cun separticipar a fiastas da cant. Denter auter ein ils da Danis-Tavanasa stai il 2018 a Chiavenna ed igl onn vargau a Wigoltingen alla fiasta cantunala dalla Turgovia. Era dalla fiasta da cant federala il 2022 a Gossau ei il chor returnaus a casa culla nota 6.
Actualmein ei il Chor Uvriu amiez la turnea da concerts. Las 31 cantaduras e cantadurs ein viagiai ils 14 e 15 da mars 2026 ell’Engiadina (mira rubrica Orizonts da LQ). Ils concerts ein sut il motto ‘sentupadas’. «Sentupadas per cantar in per l’auter, e forsa per in auter auditori ch’igl usitau el vitg. La turnea ei en scadin cass in motiv da s’unir e da cantar communablamein», ha la presidenta Daniela Hefti circumscret la turnea. Per quella ha il Chor Uvriu realisau l’emprema part dil program giubilar. Per commemorar il giubileum da 20 onns ha il chor giu in’idea extraordinaria. «Ell’emprema part mirein nus anavos e seregurdein, ed ella secunda mirein nus anavon e creein zatgei niev», explichescha Daniela Hefti.
Program «Best-off»
Per la turnea ha il chor priu ord truchet las pli bialas canzuns ch’el ha cantau dapi 2006. «Mintgin da nus ha astgau eleger las canzuns preferidas dils davos 20 onns. Quellas cullas pli biaras vuschs han dau in ‘best-off’ e gest era il program da concert. Igl ei canzuns sco «Desideri» da Gion Balzer Casanova, canzun ord la cantata «Ursin» dad Albert Spescha, «Ei tucca da notg sil clutger» da Benedetg Dolf, «Primavera» da Gion Antoni Derungs ed autras. Silla turnea ell’Engiadina ha il Chor Uvriu cantau quellas a Zuoz e sonda e dumengia proxima a casa a Danis ed en Lumnezia cul Chor mischedau Vignogn.
Program «10 premaudiziuns»
Culs concert da dumengia a Vignogn finescha la turnea e l’emprema part dil program giubilar. Ils meins d’avrel e matg ha il Chor Uvriu lu peda da sepreparar per la secunda. «L’entschatta zercladur ei il concert giubilar a casa. Aposta pil giubileum havein nus schau scriver diesch cumposiziuns novas – finadina ei ina premaudiziun», raquenta Daniela Hefti. Els hagien grond plascher da presentar quellas canzuns novas ch’els contien l’emprema gada. Igl ei ovras che otg cumponists indigens han fatg aposta pil Chor Uvriu. Albert Spescha, Alexi Nay, Armin Caduff, Flavio Bundi, Gion Andrea Casanova,Gion Balzer Casanova e Mario Pacchioli han fatg canzuns tenor texts da convischins dalla vischnaunca da Breil, sco Pieder Antoni Livers, Sep Mudest Nay, Michel Maissen e GionBattesta Spescha. «Nus havein buca vuliu crear zatgei unic che va silsuenter en truchet, mobein zatgei che duess star a disposiziun ad auters chors», puntuescha la presidenta dil Chor Uvriu. Avon ch’igl ei schi lunsch cullas diesch premaudiziuns selegra il Chor Uvriu silla sentupada culla populaziun a Danis e sin quella en Lumnezia cul Chor mischedau Vignogn.
Ils concerts dalla turnea da giubileum «20 onns Chor Uvriu» ein sonda, ils 28-3-2026, allas 20.00, ella baselgia da Danis. La dumengia, ils 29-3-2026, allas 14.00, meina la turnea en Lumnezia. Il Chor Uvriu sepresenta en in concert communabel cul Chor mischedau Vignogn.
Gust da leger dapli?