Gudignau la concurrenza «Poster of the Month»

Ensemen cun tschun studentas e students dalla Scol’aulta professiunala Grischun ha Surselva Turissem gudignau il premi «Poster of the Month». Tschun absolventas ed absolvents dil Bachelor en producziun da multimedia han sviluppau communablamein cun Surselva Turissem SA la campagna d’unviern «Komm nicht in die Surselva, …». Il premi ei vegnius surdaus dalla societad per reclama APG (Allgemeine Plakatgesellschaft) pil poster dil meins da fevrer 2026. Sco quei che Surselva Turissem scriva en ina communicaziun als mieds da massa, ei la campagna succedida en collaboraziun dalla destinaziun, dil studi per producziun da multimedia dalla Scol’aulta professiunala Grischun e l’agentura Ferris Bühler Communications. «Cun quei premi vegn buca mo honorau ina campagna creativa, mobein era ina buna collaboraziun denter pratica e scola. Studentas e students han survegniu la caschun da realisar projects reals da communicaziun per la destinaziun da turissem», scriva Surselva Turissem.