In dialog musical senza pleds

In dialog senza pleds, quai porscha il Chor da dunnas Vaz questa fin d’emna cun ses concert «Ohne Worte». L’idea da quel saja da colliar tras la musica quai che la lingua sparta, uschia il dirigent dal chor Lukas Moos. Il program da concert ha el damai arranschà uschia che differents stils sco classic, jodel e jazz fan punts e dialogs in cun l’auter empè da pleds. La finamira saja da porscher dapli che be musica, sco ch’il dirigent ha ditg durant in’emprova envers la FMR: «Jau vi raquintar in’istorgia tras las chanzuns.»

Classic, jodel e jazz

L’impuls d’arranschar in concert senza pleds ha l’«Adiemus – Songs of Sanctuary» da Karl Jenkins dà, sco che Lukas Moos scriva en la broschura dal concert. Il cumpositur valisic collia en quella ovra musica d’orchester classica e musica da chor cun ina tempra da musica africana, asiatica e da tut il mund – e quai apunta senza pleds concrets. Sco part da ses concert chanta il Chor da dunnas Vaz damai era tschintg da las chanzuns da questa ovra.

Sco ulteriuras parts principalas entran alura differents stils da musica en in dialog senza pleds, numnadamain «Klassik meets Jodel» e «Jodel meets Jazz». Quai na fan las 28 dunnas dal chor dentant betg persulas. Ellas vegnan accumpagnadas d’in orchester ad hoc sco era da la chantadura da jazz Anna Bläsi e la jodladra Andrea Küttel. Las duas solistas vegnan cunzunt cun lur improvisaziun communabla da jazz e jodel a procurar per in mument spezial. «Igl è tenor mai adina puspè ina schanza da pudair lavurar cun solistas giuvnas», ha Lukas Moos ditg en quest connex.