Spargnar in bel rap cun planisar meglier

Probabel èsi per bleras lecturas e blers lecturs café fraid. Ma per mai èsi stà ina scuverta: las cartas dal di da spargn, per tudestg la «Spartageskarte» dal traffic public en Svizra.

Jau sun da viadi regularmain cun ils meds publics, saja privat u per viadis da lavur. Jau n’hai però nagins abunaments spezials, cun excepziun da la mesa-taxa. Mes bigliets da posta, tren u bus cumprel jau – grazia a las apps sin il telefonin – a curta vista. A fitg curta vista! Sche jau hai la fortuna da survegnir anc in rabat sin in bigliet dal tren, lura ma fa quai plaschair. Ed uschiglio sai jau che jau sun mez la culpa. Ins avess gea pudì reservar pli ad ura il ticket.

Ma dacurt hai jau fatg viadi da Cuira a Berna ed enavos ed hai cumprà curt avant che siglir en il tren anc ina carta dal di per 78 francs (cun mesa taxa). En il tren hai jau lura ponderà spert: Na vendeva la SBB betg mintgatant cartas dal di da spargn, uschedittas «Spartageskarten»? – Bain cler che la Viafier federala fa quai. Anc adina! Be ch’il monsieur Truttmann n’ha betg realisà quai! Ins stuess gea mo tschertgar endretg e cumprar ordavant sin l’applicaziun ubain sin la pagina sbb.ch!

Il pretsch normal dad ina carta dal di – per girar tras l’entira Svizra – è 78 francs (mesa taxa e 2. classa). Tgi che sa gia ordavant il di da viadi po dentant spargnar in bel rap. In bigliet durant il mais da matg 2026 custa per exempel actualmain mo 49 u 44 francs, u perfin anc pli pauc. I dat dis che la SBB venda las cartas dal di per 29 francs. Però apunta, ins stuess simplamain planisar meglier ils agens viadis ed esser ad ura. Sco ils blers trens en Svizra.