Ina dispita per 40 secundas

«Noss vitg duai puspè daventar in lieu quiet» – quai ha ina petiziun pretendì avant passa sis onns a Lantsch. La dumonda d’introducir tempo 30 era sin la Voia Principala han ils petiziunaris e las petiziunarias surdà il december 2020 cun passa 100 suttascripziuns al president communal Simon Willi. Sa midà n’èsi entant anc nagut. Autos, camiuns e töfs pon anc adina charrar cun tempo 50 – ed in zic dapli – sin la via per part stretga tras il vitg (guarda foto). E quai malgrà che la Regenza ha dà glisch verda a la zona 30 gia l’onn 2024. Il project da sanar Lantsch cunter canera è dentant vegnì retardà da la vischnanca sezza. Quella, vul dir la suprastanza communala, ha fatg protesta. Las dimensiuns da la zona 30 sajan surproporziunadas.

850 meters u 40 secundas

Success n’ha la protesta da la vischnanca Lantsch dentant betg gì. La Dertgira superiura dal Grischun ha refusà ils 23 da favrer l’objecziun che la zona 30 saja ina mesira surproporziunada. L’expertisa dal Chantun, il possessur da la via pertutgada, mussia che tempo 30 haja in effect perceptibel, ch’i saja la mesira la pli moderada per cuntanscher l’effect giavischà e ch’i saja ina mesira supportabla.

Tenor l’expertisa dal Chantun fiss la zona 30 planisada sin in tschancun dad 850 meters entaifer il vitg. Quai muntass tenor la sentenzia da la Dertgira superiura ina perdita da temp da be radund 40 secundas. Ils interess publics da protecziun cunter canera prevalian en quest cas.

La suprastanza recurra

Cun la sentenzia da la Dertgira superiura n’è la dispita per la zona 30 dentant betg schliada. Sco che Simon Willi ha confermà envers la FMR, fa la vischnanca recurs. «Nus na vulain nagin tempo 30 sin la Voia Principala a Lantsch. Sin il pli pudessan nus viver cun ina pitschna zona en il center dal vitg», ha il president communal ditg. En vista da la tractativa al Tribunal federal a Losanna spera Simon Willi damai sin midadas a plaun politic: «Igl è pussibel che las circumstanzas legalas vegnan adattadas entant e che nus avain uschia success cun noss recurs.»

Concret vai per la moziun parlamentara Schillinger ch’il parlament ha approvà avant dus onns. Quella pretenda d’engrevgiar l’introducziun da tempo 30 sin axas da traffic principalas, ma spetga anc l’implementaziun en la lescha. Sco che gia la Dertgira superiura dal Grischun ha menziunà en sia sentenzia, na saja il cas da Lantsch dentant betg pertutgà da la moziun Schillinger. Quella haja en mira il traffic da guntgida. A Lantsch na dettia però naginas vias alternativas per guntgir la Voia Principala e sin quellas saja gia introducì tempo 30.

A Lantsch n’èn ins betg d’accord

Nagina chapientscha per il recurs da la vischnanca ha Thomas Stoffel, in dals iniziants da la petiziun d’avant sis onns. «Nossa finamira è anc adina tempo 30 a Lantsch. Jau na chapesch betg, daco che la suprastanza retardescha puspè il project», ha el ditg envers la FMR. I manchia la solidaritad cun las persunas pertutgadas, ma la suprastanza haja sa chapescha il dretg da recurrer. E sco che Simon Willi ha ditg, saja quai en l’interess da blers a Lantsch: «Tenor mes sentiment è l’opposiziun cunter la zona 30 gronda a Lantsch. Mo ins auda simplamain dapli quels ch’èn per reducir il tempo.»

Ch’ins n’è betg d’accord a Lantsch, quai è per il mument tuttina secundar. Decider decida numnadamain il Tribunal federal.