Lectura Rumantscha

Sche la naiv manca …

«Ils envierns cun pauca naiv èn sa chapescha tissi.» – Na, quai n’è betg in citat d’in directur da pendicularas grischunas, mabain dal «pli aut pumpier» dal Grischun, Conradin Caduff. Sche la naiv manca als skiunzs durant l’enviern, manca numnadamain era l’aua als pumpiers durant la stad. Entant ch’ils ins han l’alternativa cun naiv artifiziala, ston tschels chattar autras schliaziuns damain plaschaivlas, sco che Conradin Caduff ha explitgà en l’intervista cun la FMR.

Il past da Pastgas

Has ti forsa planisà da cuschinar tschut u ansiel per Pastgas? Alura es ti be pli ina u in da paucs. Quest past tradiziunal n’è numnadamain betg pli uschè popular sco a sias uras. Quai sentan er ils mazlers sco Romeo Janki da Vuorz. Tenor el saja ozendi sin il menu da Pastgas plitost in bun brassà u fratem bov. Ed i dettia er adina dapli glieud che desistia insumma da charn. Jau giavisch en mintga cas bun appetit – cun u senza charn, cun bov u ov!

Suenter il tschivel final

Na, la tensiun n’ha betg mancà en l’Engiadin’Ota ils ultims mais. Per quella ha la SGO numnadamain procurà regularmain. Entant ha quella istorgia dal provediment da sanadad regiunal però chattà ina fin. Quai vala era per il mainagestiun ad interim Rolf Gilgen. Quel na sa al mument anc betg, tge ch’el vegn a far ussa ch’il tschivel final è resunà – danor ch’el sa legra da guardar il campiunadi mundial da ballape.

E sche ti vuls anc ina giada repassar ils suns e tuns dal mais mars, alura chattas ti quels en «In mais da pais». Bun divertiment!