Ils ins miran ensi – ils auters plitost engiu

La fin d’jamna da Pastgas cuntinuescha il campiunadi da ballapei. Buca per tuttas equipas, mo denter auter per quellas dalla gruppa 1 dalla 3. ligia. En quella gruppa semesiran era Schluein Glion, Trun/Rabius e Lumnezia. Suenter las empremas endisch rundas dil campiunadi – respectivamein la mesadad da quel – schai Schluein Glion sil secund plaz dalla tabella. Damai che Cuera 97 ha gia gudignau siu emprem giug da questa primavera encunter Walenstadt, ei Trun/Rabius ussa novavel e Lumnezia dieschavel dalla rangaziun cun dudisch equipas. La situaziun ei pia clara: Schluein Glion batta per in plaz davontier ella tabella, ferton che Lumnezia e Trun/Rabius ston tschentar lur prioritads el cumbat encunter la relegaziun.

Ferdau aria da Barcelona

«Nus lein cuntinuar cul slontsch digl atun. Naven dil settember ha l’equipa fatg bia endretg.» Quei di il schef dil sport dall’Uniun sportiva Schluein Glion, Urs Casutt. Il cader che sepresenta sonda suentermiezdi egl emprem giug da primavera encunter Mels ei pli u meins identics cun quel digl atun. «Nus havein trenau fetg bein quest unviern ed ussa la primavera. Denter auter havein nus fatg quei cun in camp a Barcelona. Leu havein nus gudiu bunas cundiziuns da trenar», di Urs Casutt. La finamira dall’emprema equipa da Schluein Glion ei clara: «Nus havein ina squadra fetg giuvna. Nus lein sviluppar vinavon ella. La constanza e la prestaziun defensiva che han muncau per part els emprems giugs digl atun ei semigliurada naven dil settember. Vid quei lein nus luvrar vinavon.» Giugadurs e responsabels veglien prender in giug suenter l’auter. «Nus lein dar in bien ballapei. La fin dalla stagiun vesin nus lu nua che nus stein. Nus lein sefocussar sin nossas fermezias ed eliminar las fleivlezias», puntuescha Urs Casutt. Digl emprem adversari da questa primavera – Mels – di el: «Per mei ei quei ina dallas meglieras equipas en quella gruppa.» Encunter Mels haveva Schluein Glion spiars igl atun a casa cun 2:3. Igl emprem giug vegn pia a mussar, schebein l’aria da Barcelona inspirescha.

Contonschiu il maximum

Suenter la runda d’atun sesanfla il CB Lumnezia cun otg puncts sil dieschavel plaz dalla tabella dalla gruppa 1 dalla 3. ligia. Igl avantatg sin in plaz da relegaziun munta a mo dus puncts. Ella retrospectiva ei il trenader dils Lumnezians tuttina cuntents cun quei resultat: «Considerond la situaziun da persunal cun biaras blessuras havein nus contonschiu il maximum.» Cunquei che la situaziun seigi semigliurada daferton, seigi la finamira dalla runda dalla primavera da tener la posiziun e da mirar ensiviars ella tabella: «Ils plazs alla cua dalla tabella stuessen buc esser tema per nus. La premissa ei denton che nus hagien buca puspei blessuras pli grondas da giugadurs da tschep.» Avon igl emprem giug dalla runda da primavera ei Marco Blumenthal pia optimistics, era perquei che la preparaziun seigi stada fetg buna: «Jeu sun cuntents aschilunsch culs trenaments duront igl unviern. Nus havein era giu in fetg bien camp da trenament. Il sulet che nus savein buc influenzar ei la situaziun da neiv. Quella ha sfurzau da restar en halla per gronda part.» En vesta agl emprem giug procura la neiv dil mars schiglioc buca per problems. La sonda da Pastgas frunta Lumnezia ordeifer sin Triesenberg. Encunter quell’equipa han ils Lumnezians recaltgau in punct igl atun.

Nezegiar meglier las schanzas

Trun/Rabius parta sonda el campiunadi encunter Triesen. Encunter quei adversari han ils Sursilvans spiars igl uost vargau cun 1:3. Tonaton ha Trun/Rabius ussa quater puncts dapli sil conto che Triesen. El cumbat encunter la relegaziun ei quei giug d’impurtonza per omisduas equipas. «Nus essan semtgai pil campiunadi. Il camp da trenament a Tenero ed ils trenaments ein stai buns. L’aura, respectivamein la neiv dallas davosas jamnas, ha denton restrenschiu las pusseivladads da trenament», di il trenader dil CB Trun/Rabius, Claudio Bundi. Cun pintgas excepziuns – denter auter dus giugadurs ch’ein ella scola da recruta – sa l’equipa dalla Cadi cuntinuar la primavera cul cader ch’ella ha terminau igl atun. «Nossa finamira ei da semigliurar surtut avon il gol dils adversaris. Leu stuein nus daventar pli efficients. Ei tonscha buca mo cun crear schanzas sco igl atun, mo lu buca nezegiar ellas», puntuescha Claudio Bundi. Sia finamira ei da sviluppar vinavon l’equipa, surtut ils giugadurs giuvens. «En vesta alla situaziun actuala ei la finamira quella da restar ella 3. ligia», di il trenader. Surtut las equipas dil Liechtenstein – sco Triesen – sappien adina puspei serinforzar igl unviern. Ils giugs amicabels che Trun/Rabius ha absolviu las davosas jamnas ein stai buns ed en quei senn empermettents pil campiunadi da questa primavera.