Intervenziun massiva amiez Surcuolm
L’entschatta da fevrer 2026 ha l’interpresa Procura SA da Cuera presentau ses plans per ina surbaghegiada cun 60 habitaziuns novas amiez il vitg da Surcuolm. El rom dall’exposiziun cooperativa ei seformada ina gruppa d’opposiziun encunter quei project. E mo paucs dis pli tard ha era la Protecziun dalla patria dil Grischun priu posiziun.
El vitg da Surcuolm ei seformau ina gruppaziun che far gronda resistenza encunter il project da surbaghegiada el center da Surcuolm. (La FMR ha rapportau ils 4 da mars 2026). Cuort suenter ei era la Protecziun dalla patria dil Grischun s’annunziada cun ina posiziun tier l’exposiziun cooperativa. Ella scriva che la surbaghegiada el center dil vitg da Surcuolm seigi ina intervenziun massiva el maletg dil liug da Surcuolm. La protecziun dalla patria critichescha la vischnaunca Sursaissa Mundaun pervia da sia revisiun parziala dalla planisaziun locala ella fracziun da Surcuolm. Leu amiez vischnaunca duei vegnir baghegiau treis casas cun 60 habitaziuns. La protecziun dalla patria scriva che quella surbaghegiada hagi da far nuot cul svilup dils habitadis.
Project illegitim
La FMR ha survegniu il scriver cun l’entira posiziun dalla Protecziun dalla patria dil Grischun. Tenor quella cunterfan ils plans dalla vischnaunca Sursaissa Mundaun a differentas regulaziuns legalas sin plaun communal, cantunal e naziunal. Dil pugn da vesta da Ludmila Seifert, la gestiunaria dalla protecziun dalla patria cunterfetschi il project da surbaghegiada a Surcuolm allas disposiziuns dalla lescha cantunala per la planisaziun dil territori, al plan directiv davart ils habitadis, alla la lescha cantunala davart la protecziun dalla natira e dalla patria ed alla lescha da construcziun communala. Denter auter divergeschi la surbaghegiada «fundamentalmein» dallas prescripziuns da formaziun ella lescha da baghegiar. Il project hagi era proporziuns sur-proporziunadas enviers la baselgia parochiala da Surcuolm protegida sin plaun naziunal e cantunal.
Investur vul baghegiar e la vischnaunca quescha
Igl investur Mario Casanova dalla Procura SA ha dau d’entellir en la Suedostschweiz dils 21 da mars 2026 ch’el intenziuneschi da realisar sigl areal las treis casas da pliras famiglias cun totalmein 60 habitaziuns. Ed el renviescha al rapport da planisaziun e cooperaziun dalla vischnaunca. La vischnaunca ei entochen ussa aunc buca s’exprimida tier la posiziun dalla Protecziun dalla patria dil Grischun.
Gust da leger dapli?