La Sanadura ho 320 plazzas cumplainas
I’l sectur da sandet regiunel ho cumanzo quist mais üna nouva era: La fundaziun SGO nun exista bainbod na pü, nouv surpiglia uossa la Sanadura il lead. Stabilited e sgürezza vessan da ster i’l focus düraunt la fasa da partenza.
Daspö quist marculdi es la Sanadura scu instituziun da dret public respunsabla pel provedimaint da servezzans da sandet illa regiun Engiadin’Ota. La gestiun operativa in l’ospidel vain uossa procureda da l’Ospidel Engiadin’Ota SA, las dmuras per persunas attempedas e la Spitex vegnan mnedas ad interim da la Casea SA. A chaschun dad ün’orientaziun dals mezs d’infurmaziun in marculdi aunzmezdi es que gnieu infurmo davart il nouv cumanzamaint. Cò qualchünas respostas a dumandas chi sun gnidas fattas in quell’occasiun.
Cu as preschainta la situaziun dal persunel?
La Sanadura ho actuelmaing ün quantum da plazzas da lavur da 320 plazzas. Scumpartieu süllas singulas gestiuns sun que 180 plazzas cumplainas in l’ospidel, 85 plazzas illas dmuras per persunas attempedas, 20 tar la Spitex e 35 tar divers (servezzans da salvamaint e plazzas chi sun gnidas transferidas in otras organisaziuns). Tar la SGO d’eiran que 380. 50 persunas haun stuvieu banduner la gestiun. Dispüttas da dret da lavur nu do que tenor il l’administratur Jürg Girschweiler actuelmaing üngünas.
A Samedan dess gnir rinfurzo il servezzan per cas urgiaints. Che voul que dir concretamaing?
Insè do que taunt tar la Clinica Gut a San Murezzan scu eir tar l’ospidel a Samedan ün servezzan da 24 uras per cas urgiaints. Tenor il meidi Markus Furrer, president dal cussagl administrativ da la Ospidel Engiadin’Ota SA, po que esser in avegnir cha que vain mno in uras a l’ur be pü il servezzan urgiaint da l’ospidel a Samedan – dimena eir tar accidaints vi da l’apparat motoric dal corp.
La staziun per la chüra intensiva es gnida rimplazzeda cun üna Intermediate Care Station. Che significha que?
«Que nu significha in fuond ünguotta», ho dit Markus Furrer. Cha analisas detagliedas hegian musso cha per paziaints chi gnivan fin uossa trattos illa IPS a Samedan füss steda sufficiainta eir üna Intermediate Care Station (IMC). Propi cas greivs, p.ex. paziaints chi stuvaivan gnir sustgnieus cun respirer, füssan inamöd gnieus transferieus. Sch’ün transport in ün oter ospidel nu vess causa l’ora d’esser pussibel, es que tenor Markus Furrer garantieu ch’eir da quels paziaints pudessan gnir chüros e provedieus düraunt ün temp pü cuort.
Chi maina las dmuras per attempos, scha que nu vain chatto fin la fin da l’an üngüna soluziun?
Cler es: Las vschinaunchas haun tenor la ledscha ün’incumbenza da provedimaint, eir per la chüra a lungia düreda. Tenor Andrea Fanconi, il president dal cussagl administrativ a. i. da la Sanadura, nun es que fin uossa gratagio da chatter ün gestiunari. Cha’ls motivs sajan la strategia chera cun duos lös, la situaziun da persunel difficila, ma eir las tariffas da chüra chantunelas poch lucrativas. Ch’üna interessenta hegia decis da’s retrer. «Pel mumaint nun es l’interess avaunt maun.» Scha nu vain chatteda üna soluziun, ch’alura maina la Sanadura las operativas, taunt da las dmuras d’attempos scu eir da la Spitex.
E cu vo que inavaunt cul moratori?
Tenor l’administratur Jürg Girschweiler ho il Güdisch regiunel Malögia prolungio il moratori a partir dals 4 avrigl per trais mais. La fasa provisorica pudess zieva alura gnir prolungeda per maximelmaing ün mais. Zieva es que previs d’entrer i’l moratori definitiv e da dumander quel per ses mais, per pudair p.ex. cuntinuer ad elavurer la situaziun cun las immobiglias. Illa suspensiun definitiva dal pajamaint staun gnir integros stringentamaing eir ils credituors e las credituras, els ed ellas haun alura dapü pled in chapitel.
Gust da leger dapli?