Lectura Rumantscha

Tranter Cavistrai e Calanda

Ni Berna ni Dublin ni Thun ni S. Gagl – Na, cura ch’i va per il cor da Selina Pfister, lura hai plazza mo per in lieu, numnadamain Schlans. La giuvna chirurga avess franc pudì far carriera en la Bassa u a l’exteriur. Ma na, ella è turnada suenter ses studi da medischina en sia patria al pe dals Cavistrai. Qua sa sentia ella da chasa e vivia ils usits. Sche Schlans avess mo er in ospital, alura na stuess ella betg pendular pli a Cuira, al pe dal Calanda.

Giappim sin il Pass dal Fuorn

I sto esser stada ina pulita canera questa fin d’emna a Buffalora. Là sper il Pass dal Fuorn èn numnadamain sa scuntradas amias ed amis da chauns da schlitta cun lur Bellos e Roccos. Ed ils sportists sin quatter chommas n’hajan betg mo tratg las schlittas cun tutta forza, mabain era mussà preschientscha cun lur giappim – probablamain betg per la davosa giada en questa regiun.

Da trais sin tschintg a Medel

Las schanzas èn pitschnas, jau sai. E tuttina dumond jau uss en la runda: Es ti ina dunna da Medel? Alura dai! – La vischnanca tschertga numnadamain anc suprastants/as a curta e lunga vista! Anc quest onn cumplettescha Medel/Lucmagn sia suprastanza da trais sin tschintg commembers e proxim onn demissiuneschan il president ed in suprastant. Pia, i dovra persunal. E sco ch’i para, speran ins da chattar anc ina dunna per cumplettar la runda illustra dad umens.

A revair e bun divertiment cun la Lectura Rumantscha!