Visita a «sia» scoula a Scuol

Che pensan scolaras e scolars dal sistem da scoula? Vessan ellas o els giavüschs e dumondas al schef dal departamaint? Cusglier guvernativ Jon Domenic Parolini e la manadra da la scoula populara e sport grischuna, Chantal Marti-Müller, accumpagnats dal manader dal inspectorat districtual, Curdin Lansel, han vuglü survgnir invista i’l minchadi d’üna scoula ladina. Insembel cul manader da la scoula da Scuol, Mario Rauch ha la delegaziun dal Departamaint d’educaziun, cultura e protecziun da l’ambiaint dal Grischun (DECA) visità plüssas classas, la fuschina da la scoula ed eir la stanza da scoula, illa quala il cusglier guvernativ ha cumanzà avant üna sesantina d’ons la prüma classa. Sco cha’l DECA scriva in sia comunicaziun als mezs d’infuormaziun es la delegaziun statta impreschiunada da la lavur dal team da scoula da Scuol: «Darcheu üna jada vaina realisà la valur da la scolaziun sün mincha s-chalin, nossa materia prüma e preziusa.»