Fauturs ein s’entupai

Sonda ei l’Uniun da fauturas e fauturs Cuort Ligia Grischa s’entupada alla radunonza generala. Suenter la fundaziun igl onn 2003 eis ei stau la 23avla. Il president Daniel Tuor dau ina survesta dil curriu e passau e la cassiera Olivia Pfister presentau il quen. Mintg’onn sa l’uniun sustener il museum sursilvan da maniera efficazia e directa cun pli che 20’000 francs. In onn sustegn ella cun prestaziuns finanzialas pils basegns dil menaschi, in’autra gada per projects. Ils onns vargai ha l’uniun per exempel saviu gidar da finanziar il guid da cultura e historia dalla GSK, plinavon ha ella surpriu ina cumpart dils cuosts da sanar l’illuminaziun ell’entira casa. Era la realisaziun dil curtin ha l’uniun susteniu.

Sco quei che la cassiera Olivia Pfister ha detg sin damonda dalla FMR, vegn l’uniun da fauturas e fauturs a sustener era igl onn current in project concret. Il cussegl da fundaziun ei vidlunder da planisar in niev concept per l’exposiziun permanenta dil museum. Per quei intent collavura el cun in biro specialisau. L’uniun da fauturas e fauturs sustegn explicitamein quei project a favur dil svilup dalla Cuort Ligia Grischa. Intent dall’uniun eis ei da promover ella populaziun las valetas culturalas e da sustener lavur ed engaschi dalla Fundaziun museum sursilvan Cuort Ligia Grischa. L’uniun da fauturas e fauturs fa quei cullas contribuziuns finanzialas e donaziuns dad oz pli che 300 commembras e commembers. Commembers singuls pagan ina contribuziun da 50 francs, famiglias 75 francs e firmas e vischnancas 100 francs.