Laax varga la marca da 2400 habitonts
La vischnaunca da Laax crescha ad in crescher – e prosperescha era en caussa finanzas. Quei muossa il quen annual 2025 che la suprastonza communala ha gest publicau. La cassa communala muossa in gudogn schuber da 3,915 milliuns francs.
Sco mintg’onn introducescha il president communal il rapport cun ina retro- e prospectiva. Franz Gschwend renda gl’emprem attent al svilup dalla populaziun. Suenter che la cefra da habitonts cun domicil permanent eri sestabilisada il davos sin 2000, seigi la vischnaunca carschida puspei levamein il 2025 per bunamein 5 %. «Ils 31 da december 2025 habitavan 2365 persunas a Laax», san ils da Laax prender notizia el quen annual ch’els han retschiert. Igl ei in carnet da 41 paginas, pulpius cun nums e cefras. Gl’entir cumpendi dil prestau il 2025 resumescha il president communal en projects realisai, projects che cuntinueschan e projects che la vischnaunca instradescha il 2026.
Punt sur la Val Draus
Peisa dat la vischnaunca actualmein ed el proxim futur al manteniment dall’infrastructura. La via che meina el quatier d’industria Pardanal vegn sanada, plinavon las vias Valetta, Stuorns e Tesli. In project interessant ch’ei sin rucca ei la punt sur la Val Draus. Igl ei previu da construir ina colligiaziun segira e sempla pil traffic plaun denter Murschetg e Staderas. Quella colligiaziun ei d’impurtonza pervia dalla centrala da calira a distanza che la proveditura Flims Electric realisescha dapresent a Prau Pulté. Quella centrala garantescha a liunga vesta il provediment d’energia ton per Flem Casa d’Uaul sco per Laax Murschetg.
Plinavon ha la vischnaunca instradau l’avertura d’in ulteriur quatier da habitar a Cons. Igl ei planisau da reparter la nova zona da habitar en endisch parcellas cun dretg da baghegiar. Vitier duess ei dar ina zona per casas da pliras habitaziuns cun spazi da habitar pagabel. Encunter il plan da quatier che la vischnaunca ha publicau miez uost 2025 han opponents inoltrau recuors alla Dertgira superiura dil Grischun. «La planisaziun dalla via sco era da tuttas lingias sutterranas necessaria, illuminaziuns e l’ulteriura infrastructura ei bunamein finida. Sche la dertgira pren in conclus positiv en nossa favur, san las lavurs d’avertura entscheiver la stad 2026», communichescha il president communal.
Plirs recuors blocheschan
Cun recuors ei la vischnaunca aunc adina confruntada en connex cun dus auters projects per spazi da habitar pagabel per indigens: La casa da pliras habitaziuns Mira Crap a Cons e la surbaghegiada Denter Vischins a Davos Baselgia ein bloccadas pervia da recuors pendents. «Nus essan da buna fei che las proceduras mondien a fin e ch’ei seigi finalmein pusseivel d’entscheiver a baghegiar», scriva Franz Gschwend en siu rapport annual.
La carschen da recuors encunter projects communals va en scadin cass a pèr culla carschen dalla populaziun. Daferton, suenter ils emprems meins digl onn 2026, vegn la cefra dils habitonts permanents a Laax ad esser arrivada silla marca 2400. La carschen tochen ils 31 da december 2025 semuossa el quen da menaschi: Quel siara, tier entradas da 31,153 milliuns ed expensas da 25,096 milliuns, cun in cashflow da 6,057 milliuns francs. Quei recav aschi positiv ha lubiu alla vischnaunca da far amortisaziuns ella valeta da 2,141 milliuns francs, aschia che la contabilitad siara cun in avanzament schuber da 3,915 milliuns francs.
Pro Laax ha retschiert 752 000 francs
La pli gronda part dil rapport annual ei lu era reservada ad amaturas ed amaturs da cefras. Conform all’obligaziun presenta la vischnaunca ils detagls dallas entradas ed expensas. Ina cefra interessanta ei igl agen capital: La vischnaunca da Laax posseda culs 31 da december 2025 ina summa da 91,728 milliuns francs. Il capital jester dalla vischnaunca ei 27,227 milliuns francs. El quen current 2025 dat la cefra dallas taglias specialas en egl. Gl’onn precedent 2024 haveva la vischnaunca incassau totalmein 7,621 milliuns francs talas taglias specialas, gl’onn 2025 ei la cefra carschida sin 9,340 milliuns francs. Ina taglia speciala ei per exempel la taglia da gudogn sin schischom, ni quella ch’il maun publica impona sin ina midada da maun. A Laax profitescha la fundaziun Pro Laax da quella, ella survegn mintg’onn ina cumpart da 0,5 % ord quei tribut fiscal. Aschia ha ella retschiert gl’onn 2025 la summa respectabla da bunamein 752 000 francs.
Gust da leger dapli?