Sala plagna par la reavertura digl museum
Sonda passada ân igls cumembers da l’Uniùn digls miniers digl Ragn Posteriur preschanto lur museum restructuro a Calantgil. A l’avertura â egn teater raquinto l’istorgia da las lavurs a da las dalurs an las mineras.
La sala polivalenta da la scola viglia da Calantgil e stada plagna antocen igl davos cantùn. Var 160 parsùnas en s’interessadas sonda passada pigl museum restructuro a par l’istorgia digls miniers c’ancurevan fier, argient, plum ad arom an la regiùn.
Daspetas parve da las mineras
Andrea Cantieni â salido igls giasts, par suainter dar igl pled agls acturs sen tribuna. Tschentg parsunas ân giujieu l’istorgia da l’explotaziùn da metal an la regiùn, da maniera c’igls visitaders a las visitadras ân survagnieu egna investa an la tematica a las daspetas digls signurs Holzhalb a digl Barùn da Lantsch Sut. Holzhalb ancureva fier an las muntognas da la Val Schons a da la Val Ragn. A cura c’igl Barùn da Lantsch Sut â lieu ancurir an las mineras digl concuraint argient, plum ad arom, â quegl do gràndas daspetas.
Suainter la preschantaziùn da teater â Andrea Cantieni mano anavànt igl program a clamo sen tribuna igl president da l’Uniùn digls miniers digl Ragn Posteriur, Johannes Mani. Ear el â angraztgieu a tut igls gidànters ad a tut las parsùnas interessadas ad â anvido agl aperò an l’ustreia Alpenrose ca satgata gest sut la tgea da scola. Igl museum e sto aviert par tuts, a par raspunder amparadas en stos a disposiziùn igls organisaturs.
«Par antalir igl preschaint»
Igl Museum da las mineras a Calantgil sa preschainta uss an en nov vastgieu: Las pares en ornadas cun tgartas a tavlas d’infurmaziùn, agl plàn sura en palandos sei maletgs digls miniers a da lur istorgia. Igls projectaders ân daveras creo egn beal museum da l’industreia da minieras. Sen la dumonda partge c’igl dovra anzuma egn museum, â Johannes Mani raspundieu sonda: «Par ca la glieud amprenda ad ancanuscher igl passo, c’ign sa antalir igl preschaint ad ascheia planisar igl futur.»
Gust da leger dapli?