Fitness per in ferm cor

La gruppa dil cor Surselva porscha fitness, exercezis e moviment per persunas che piteschan d’ina malsogna dil cor, che han giu in infarct ni ina operaziun dil cor. Menadra dalla gruppa ei la fisioterapeuta Rilana Caduff da Morissen che lavura sco fisioterapeuta el Spital regiunal Surselva a Glion.

Rilana Caduff di che la gruppa dil cor porschi ina pusseivladad a pazientas e pazients dil cor da star en moviment. «Igl ei buca decisiv con ditg anavos che la malsogna dil cor schai. Decisiv eis ei d’esser activs. Cun nossa gruppa dil cor succeda quei en in rom protegiu e cumpurtabel.»

En moviment pigl equiliber

Rilana Caduff declara che l’ura da gimnastica jamnila per las pazientas e pazients dil cor hagi per finamira d’augmentar il plascher per ulteriuras activitads che promovien la circulaziun dallas aveinas dil cor, che provedien da lur vart il tgierp cun oxigen. Suenter ina malsogna sto il cor emprender da puspei supportar il squetsch normal dil mintga di. La gimnastica ed il moviment contribueschan a quella fuorma. Ultra da quei ei il trenament era buns pil level dil zucher dil saung, per la pressiun dil saung e per las valetas dil grass el saung. «Nus sco organisaturas dalla Gruppa dil cor Surselva cussegliassen era a persunas cun surpeisa ni diabetes da separticipar da nossa gimnastica per stabilisar la sanadad a liunga vesta», declara Rilana Caduff.

Scumiar experientschas

«Ils aspects dil moviment ei ina vart dalla medaglia», di Rilana Caduff. «L’autra vart ein ils contacts persunals che funcziuneschan fetg bein en nossa gruppa.» La participonta ed ils participonts cultiveschien bunas relaziuns persunalas. «Aschia dat quei era la pusseivladad da scumiar experientschas pertuccont las malsognas dil cor», di la menadra dalla gruppa. Ei seigi era impurtont da saver profitar dils cussegls viceversa e perquei mondien entgins suenter la gimnastica a beiber enzatgei per seser ensemen in’uriala ell’ustria.

Enconuscher igl agen tgierp

La gimnastica per pazientas e pazients dil cor vegn instruida tuttina sco la gimnastica usitada per carschi. La fisioterapeuta Rilana Caduff di ch’ei seigi impurtont che mintgina e mintgin enconuschi siu agen tgierp aschi bein ch’el sappi giudicar con lunsch ch’el astgi ir cun pretender da siu tgierp. «Sch’enzatgi vegn en flad e po buca pli duront in exercezi, lu eis ei da far pausa. Igl ei impurtont ch’ins desista cura ch’ins po buca pli.»

Forza, movibladad e perseveronza

Il cuntegn dallas lecziuns da gimnastica varieschien da gada tier gada, di Rilana Caduff che meina la gruppa ensemen cun sia collega Petra Cavegn da Vella. La direcziun medicinala ha il miedi dil cor Mirlind Kastrati dil Spital regiunal Surselva. Culla gimnastica duein la forza, la movibladad, la perseveronza e la ballontscha vegnir optimadas. «Nus trenein la cundiziun cun cuorer ni ir spert a pei, fagein exercezis da gimnastica e dein giugs.» Pil pli reusseschi ei d’integrar en ina lecziun plirs nivos da cundiziun. «Ei dat era situaziuns nua ch’jeu stoi separar ils exercezis pli pretensius e meins pretensius pil tgierp.»

Dalla Cadi entochen en Lumnezia

Dalla Gruppa dil cor Surselva che festivescha uonn siu giubileum da 25 onns ei vegnida fundada dils miedis Martin Tomaschett da Trun e Rolf Thouet dil spital da Glion ensemen culla scolasta da sport Brigitta Casutt ed il fisioterapeut Renato Brazerol separticipeschan actualmein 13 persunas dall’entira Surselva. Per la menadra actuala Rilana Caduff munta la gimnastica culla gruppa dil cor era ina satisfacziun persunala ad ella. «Jeu haiel fuffergnau inagada tier miu antecessur Renato Brazerol ed hai immediat survegniu tschaffen da quei job. Quei che motivescha cunzun mei ei la biala atmosfera. Nus havein bia legher ed ils participonts ein fetg motivai.»