Quater gols e treis puncts: Surselva dominescha a Gossau

Naven dall’entschatta ha il Team Surselva saviu mussar exact quei ch’el leva: Dominar il giug e crear schanzas. E la ferma prestaziun ei sepagada.  Ella 17avla minuta marca Anja Furger il pli che meritau 1:0. Las Sursilvanas han fatg vinavon gronda pressiun ed ein vegnidas tier pliras fetg bunas schanzas, denter auter in siet ella traversa d’Anja Furger. Il secund gol leva denton buca curdar. Las davosas 15 minutas avon la pausa ha Gossau surpriu il giug e smaccau las Sursilvanas pulit ella defensiun. Pliras gadas ein las dunnas da Gossau vegnidas fetg datier dil gol. Cun spertas attaccadras ein ellas vegnidas tier enqual malsegira acziun, denton ha la ferma defensiun dil Team Surselva saviu impedir pli gronds prighels.

La pausa ha fatg bein allas Sursilvanas. Ellas han surpriu immediat il commando ed ella 47avla minuta eis ei reussiu ad Anja Furger dar marcar siu secund gol. Cun tempo, perschuasiun ed ina bial’acziun singula ha ella cuglienau la golia e stuschau il bal da gol en. Offensiv ha il Team Surselva creau vinavon bialas schanzas entras bunas e creativas cumbinaziuns. Ella 72avla minuta ei Romina Cavegn lu vegnida da mitschar cun sia spertadad dall’ala si, ha dau en ina biala flanca aschia che Mara Blumenthal ei vegnida da nezegiar pil 3:0 per las Sursilvanas. Allas dunnas da Gossau era l’aria plaunsiu naven. Il Team Surselva haveva denton aunc buc avunda. Jana Caduff vegn da semetter atras ella da sedisch, dar in pass a Chiara Lorena Cavegn e lezza marca cun in bellezia siet il 4:0 per las Sursilvanas. Malgrad la ferma prestaziun dalla defensiun ha il Team Surselva aunc stuiu acceptar in gol ellas davosas secundas dil giug, suenter ina fetg biala acziun dallas giugaduras da Gossau. Suenter in bellezia pass traversal ha era la ferma golia Laura Casanova buca giu schanza da tener il bal. Cun treis puncts ordvart ei la runda da primavera reussida cumpleinamein al team da dunnas dalla Surselva.

Lorena Spescha

Legenda. Foto mad

3. ligia, gruppa 1, dunnas
Gossau – Team Surselva 1:4

Gols: 17. Anja Furger 0:1, 47. Anja Furger 0:2, 72. Mara Blumenthal 0:3, 82. Chiara Lorena Cavegn 0:4, 1:4.

Gossau: Fatima Luana Correia Faria, Morena Eva  Abelleira Torralba, Larissa Urscheler, Alessia Brunner, Nadine Fürer, Noelia Settembrini, Ditjona Tamaj, Fabienne Albert, Samya, Ucan, Laura Hostettler.

Team Surselva: Laura Casanova, Flurina Carigiet, Lorena Spescha, Selina Tomaschett, Lucia Seiler, Sina Demont, Chiara Lorena Cavegn, Anja Furger, Romina Cavegn, Jana Caduff, Laura D’Atria. Reservas: Anna Lena Dolf, Mara Blumenthal, Valentina Albin. 

Remarcas: Team Surselva senza Martina Beeli (serrada), Silja Montalta, Lina Rieder, Luzia Tschuor, Ronja Muoth, Danja Cavigelli, Norina Bruhin e Jasmin Bearth. 40. minuta carta melna Flurina Carigiet.