Victoria ordeifer a Triesen

Ellas empremas minutas ein ils giugadurs dil CB Trun/Rabius stai plitost defensivs e han surschau il bal agl adversari. Ella 16avla minuta vegn Triesen tier l’emprema schanza sin gol. Suenter in’uriala ei era l’equipa dalla Surselva vegnida pli activa ell’offensiva e ha aschia creau l’emprema schanza ella 18avla minuta. Triesen ha empruau cun bals liungs da surmuntar la defensiun da Trun/Rabius. Denton ei il goli Livio Lozza adina staus presents ed aschia teniu sia equipa el giug. Ella 28avla minuta vegn ei tier in penalti per il CB Trun/Rabius. Quella schanza vegnan els deplorablamein buca da nezegiar. Tochen pausa han ils Sursilvans fatg grond squetsch ed ein vegni tier bia bunas schanzas ch’ein denton buca resultadas ad in gol.

Suenter pausa ein las empremas minutas stadas ruasseivlas. Ella 56avla minuta vegn Triesen denton da marcar siu emprem gol. Entras in culp liber da Robin Monn setschenta il bal tier Orlando Monn ed il Trun/Rabius vegn aschia da marcar igl 1:1. Aschia vegnan els da mussar ina sperta reacziun gia duas minutas suenter il cuntergol. Trun/Rabius lai buca suenter ed aschia marca Daniel Lopes ella 66avla minuta il gol decisiv. Quel marca el cun in siet sut la traversa dil gol. Silsuenter muossa l’equipa dalla Cadi vinavon ina ferma prestaziun e vegn aschia dad ir a casa culs treis puncts meritai.

Quella victoria ei stada fetg impurtonta, damai ch’igl adversari sesanflava avon il giug mo quater puncts davos il CB Trun/Rabius. Il proxim giug da campiunadi ha l’equipa da Trun/Rabius gia venderdis sera a casa encunter Cuera 97.

3. ligia, gruppa 1
Triesen – Trun/Rabius 1:2 (0:0)

Gols: 56. Raphael Auer 1:0, 58. Orlando Monn 1:1, 66. Daniel Lopez 1:2.

Trun/Rabius: Livio Lozza, Elia Schmed, Lucas Seiler, Mathias Flepp, Orlando Monn, Mirco Pfister, Matia Friberg, Nico Caduff, Robin Monn, Andri Carigiet, Daniel Lopez.

Reservas: Rovin Schmed, Denis Monn, Matteo Bergamin, Enea Decurtins, Patrizio Decurtins, Toni Cathomas e Livio Vincenz.

Remarcas: Trun/Rabius senza Andrin Wolf, Silvan Muoth, Roel Schmed, Nic Culan Jacomet, Tizian Duff, Aurelio Carigiet ed Andrè Canas Da Silva.