«Bon printemps», matg e cucu

Biars concerts tematics ha il Chor mischedau da Schluein gia purschiu el decuors da sia historia. Fundaus 1967 ord las retschas dil chor viril eis el sesviluppau el decuors da quels 59 onns – empau sco la glina – cun temps da carschen e digren. Actualmein dumbra il chor 22 cantaduras e cantadurs.

Cun formaziun giuvna

Gl’unviern vargau ha el exercitau sut la bitgetta dils co-dirigents Carla Brunold e Curdin Caduff. Il motto dil concert 2026 ei «Primavera destadada». Actualmein s’accorda quel exact culla realitad: La natira ei propi sedestadada e fa plascher a pign e grond, giuven e vegl. Il Chor mischedau Schluein concertescha uonn cul chor da giuvnas PiCant. Marina Bearth ha surpriu gl’atun vargau la direcziun musicala da quel. Il program da concert da quella formaziun giuvna cuntegn diesch canzuns els lungatgs romontsch, engles, franzos e svedes. La canzun «Vem kann Segla förutan Vind» ei ina damonda: «Tgi sa navigar senza vent?». Igl ei ina canzun da cumiau. Era autras canzuns, per exempel «Batterdögls» dall’Engiadinesa Braida Janett ni «Blackbird» dils Beatles, vegnan a muentar emoziuns.

En tut cuntegn il program da sonda proxima 20 canzuns, da quei pliras communablas. Il chor da Schluein metta veramein el center ils sentiments da primavera. Ins astga tedlar ina varietad da canzuns. Per exempel «Emprem’amur» da Gion Balzer Casanova, il madrigal «Dis-moi beau printemps» dad Orlando di Lasso e la romantica «Lubesch’a mi o biala». Il chor conta il text romontsch che Gion Deplazes ha fatg per la cumposiziun da Johannes Brahms. Il cucu, il matg, sper la mar, gl’igniv e l’africana «E Lah» cul ritmus che savess caztgar l’auditori da sesalzar.