Ina plazza da sport per tuts

Avon dus onns e miez, il settember 2023, era la situaziun vidlunder da sesclarir. Tochen lu haveva l’idea d’in hotel grond a Vella impediu la discussiun d’ina plazza da sport e da ballapei sil Bual a Vella. Leu dat il Club da ballapei Lumnezia (CBL) ses giugs, la plazza corrispunda denton buc allas normas ed era ils indrezs sanitars ein nunsufficients. Gitg ha la vischnaunca spitgau sin ina decisiun pertuccont il hotel grond sin quei areal.

En gliez cass havess il menaschi da sport e ballapei stuiu far plaz al hotel ed il CBL untgir silla plazza a Degen. Suenter ch’ils investurs han mess ad acta il project da hotel en quei liug, ei la situaziun da partenza clara. «Il credit da planisaziun da 265 000 francs per la plazza a Vella ha la radunonza communala concediu ils 13 da mars 2026 e la plazza a Degen ei cunquei buca pli in tema per nus», gi il president communal Daniel Solèr.

Il CBL spetga dagitg

Actualmein ein dus biros vidlunder d’elaborar ils detagls dil project. In d’els, gl’architect indigen Thomy Sgier, ha gudignau la concurrenza pil baghetg d’infrastructura. L’auter, gl’architect da cuntrada Wegmüller, specialisaus sin plazzas da ballapei, planisescha lezza part. Suenter che la radunonza communala e la regenza grischuna han approbau ina revisiun dallas zonas, ei tut semtgau per engrondir ed adattar l’infrastructura sigl areal a Bual sur il vitg da Vella.

Ina sanaziun digl implont seigi urgenta e las scolas drovien dapli plaz per l’instrucziun da sport, haveva il president communal Daniel Solèr getg il settember 2023 alla FMR. Il CBL spetga aunc pli gitg sin ina decisiun e sin ina migliur dalla situaziun. «Dapi ch’jeu hai surpriu il 2021 quei ressort, havein nus giu numerusas sesidas pervia da quei», declara Rafael Cabalzar. Il schef d’infrastructura dil CBL ei leds ch’ei va finalmein ella fasa da realisaziun: «Jeu manegel che quei plaz niev vegn a dar in stausch al sport da ballapei.» Era ils fans vegnien el futur pli bugen a mirar ils giugs.

Ina plivalur per la vallada

Marco Blumenthal, il trenader dall’emprema equipa dil CBL, conferma era ch’ei seigi neras uras ch’ei schabegi enzatgei en caussa optimar la plazza Bual, pertgei il stabiliment d’infrastructura seigi en in schliet stan. «Sche quei vegn buc ussa, lu mai», eis el perschuadius. Marco Blumenthal puntuescha denton in fatg essenzial: La plazza da ballapei surveschi buca mo al CBL, mobein all’entira populaziun, gi el e dat d’entellir: «Igl ei ina plivalur per l’entira vallada.» Aschia sappien las scolas organisar sin quei plaz niev ils gis da sport ed era ad equipas dalla Bassa porschi gl’implont la pusseivladad d’organisar camps da trenament en l’altezia.

Con vegn quella plivalur a custar alla vischnaunca? Demai ch’ils planisaders han aunc buca finiu lur lavur da detagl, sa il president communal Daniel Solèr buca numnar ina cefra. Sch’ins parta dil credit da planisaziun da 265 000 francs, eis ei da quintar che la suprastonza communala vegni a presentar al suveran ina damonda da credit da biebein tschun milliuns francs.

Lavur cumina ei previda

Pervia dils cuosts dalla plazza da sport e ballapei puntuescha Rafael Cabalzar, il schef d’infrastructura, ch’il CBL hagi previu d’organisar acziuns da lavur cumina. «Vid il baghetg savein nus far quei. Jeu quentel cun gruppas da mintgamai 15 persunas. Nus havein avunda persunas dil fatg en nossas retschas.» Rafael Cabalzar quenta da saver clamar sia glieud naven dalla primavera 2027. «Aunc ussa ei nuot concret. Nus essan denton en stretg contact cugl architect pervia da quei», gi il schef d’infrastructura en connex culla lavur cumina previda.

Co vesa il president communal Daniel Solèr la planisaziun da termins? «Il pli optimal fuss d’entscheiver il 2027», manegia el. Sche quei seigi lu la primavera ni pér gl’atun 2027 sappi el buc, tut dependi co la votaziun mondi. Il president communal puntuescha denton che la vischnaunca vegli buca realisar in project exclusiv pil CBL, mobein in implont da sport che stetti a disposiziun dall’entira vallada. La plivalur, ch’il trenader Marco Blumenthal ha menziunau, conferma el: «Il plaz che nus vulein realisar vegn a cumpletar la purschida d’infrastructura sportiva dall’entira regiun.» Da grond’impurtonza seigi che la collaboraziun ella regiun funcziuni aschia che tuts sappien profitar dall’infrastructura supplementara.

Il proxim pass en caussa schabegia quest atun. Sin lu vegn il messadi per mauns dalla radunonza communala ad esser semtgaus. Previsiblamein gl’october 2026 vegn quella a prender posiziun. Silsuenter suandass – el meglier cass – la fin da november 2026 la votaziun all’urna. Aschia che l’emprema badelada savess succeder il 2027.