Record da leivras in Val Bergiaglia
Ils guardgiasulvaschina haun innumbro 27 leivras in Val Bergiaglia – que es la cifra la pü ota daspö l’an 1993. Renato Roganti e Luisa Negrini sun stos da not in gir per chatter las bes-chas tmüchas chi vivan in gods e pros.
La leivra chi’d es activa da not e tuocha tar las bes-chas fich tmüchas es difficila da chatter. Ma que do glieud chi cugnuoscha lur territoris: Que sun ils guardgiasulvaschina dal chantun Grischun. Duos da quels sun stos düraunt ils dis da Pasqua in gir per innumbrer las leivras – per savair quauntas cha que do e scha quellas staun bain. Ils duos guardgiasulvaschina, Renato Roganti e Luisa Negrini, haun innumbro 27 leivras düraunt il temp da Pasqua – que es la cifra la pü ota daspö l’an 1993.
In gir da not tres la Val Bergiaglia
Cur cha tuots dorman lavuran Renato Roganti e Luisa Negrini. Mincha prümavaira vegnan innumbredas tuot las bes-chas, da las quelas a do üna planisaziun da chatscha – tar quellas tuochan eir las leivras. Ma i stu esser il dret mumaint per las chatter, perque ch’ellas sun fich tmüchas e vivan in möd retrat.
«Il mumaint es ideel cur cha l’erva cumainza a crescher e la minchületta da prümavaira as muossa», declera Renato Roganti. Ch’alura vegnan las leivras gugent our dal god süls pros a maglier quellas minchülettas. Quellas sun tenor el bun pevel per las leivras, ma eir pels chavriöls chi tscherchan il medem. «In quist mumaint es la schanza la megldra da l’an da vzair las bes-chas tmüchas.»
Cun glüsch e camera termica a la tschercha
La ruta d’innumbraziun düraunt la not maina da Casaccia fin a Castasegna tres vschinaunchas, pros e gods. Renato Roganti lavura daspö 35 ans in quista regiun e cugnuoscha ils lös tipics da viver da las leivras. Quista vouta vain l’innumbraziun fatta cun glüna plaina, cha que nu saja ideel, ma chi’s possa tuottüna observer numerusas bes-chas. Las leivras vegnan innumbredas taunt cun agüd da glüsch scu eir cun üna camera termica chi registrescha la chalur dal corp da las bes-chas e las renda uscheja visiblas illa s-chüraglia. Cha que as muossa cha las leivras sajan pel solit i’ls istess lös, saun ils guardgiasulvaschina. Els cugnuoschan zieva 35 ans ils lös predilets da las leivras.
Üna not cun success – 27 leivras
La rutina da 35 ans güda quista not: Zieva ün cuort mumaint haun els innumbro dapü d’ün maun plain leivras. Melgrô las cundiziuns na ideelas sun els cuntaints cul resultat. «Bun, 1, 2, 3, 4, 5, 6 leivras. Que es fich bun tar glüna plaina ed ün vent uschè ferm», ho Renato Rodigari s’allegro quella not.
Gust da leger dapli?