True crime

Cur ch’eau d’he cumanzo a scriver raquints criminels d’eira que sto mieu böt da scriver roba telmaing stratta no pels chavels cha nu’s possan mê transmüder in «True Crimes», quel gener da raquint criminel hoz ferm a la moda, scu cha pera.

Linard Lum, «mieu» detectiv, d’eira eir el da quel avis ed es gnieu telmaing stüffi da giuver il tottel sainza fundamainta reela, ch’el ho fat scu cundiziun per cuntinuer sia collavuraziun da pudair svessa agiundscher a mieus raquints duos da sieus. E quels, pür memma, s’haun alura bainbod demussos scu vaira realistics.

L’oter di d’he let in ­giazetta cha in Italia saja gnieu invulo ün ­camiun cun aint 12 tonnas da tschiculattins «Kitkat», 413 793 paquettins! Il di zieva s’haun annunzchos criminalists ufficiels chi haun explicho cha invuler camiuns plains da marchanzia saja effectivmaing ün nouv gener da crim chi dvainta vi e pü ­actuel.

Cun pisser m’es dalum gnieu adimmaint mieu raquint «camiuns» ed eau m’he dit cun anguoscha: «Nu varon cò bandits cumanzo a ler rumauntsch, anzi: puter?» – Ma alura m’he quieto vaira svelt am trand adimmaint cha’ls «set raquints da Göri Klainguti e Linard Lum» sun exausts già daspö ans.

Ma da musser quista giazetta e las explicaziuns dals criminalists ufficiels a Linard Lum, quist marmuogn, la prosma vouta cha varo da chefer cun el, quelo m’he piglio avaunt seriusamaing, uossa, zieva 38 ans!

Göri Klainguti da Samedan è autur, pur e pictur.