Aventüra musicala a Ftan

Sco sch’el nu vess mai fat alch oter: Il giuven manader musical da la Società da musica Ftan, Severin Paul Brugger, ha manà in sonda saira cun bunascha e blera fiduzcha in sai svess tras il program dal concert. El nun ha be dirigi la gronda part dals tocs, el ha güst’eir surtut amo la moderaziun da quels. Eir seis möd da diriger la musica ha surprais: Coolischem e cun leivezza ha el manà la bachetta e motivà las musicantas ed ils musicants da sunar cun plaschair. Forsa cha minchatant d’eira il teater musical bod massa exagerà, ma in mincha cas haja fat plaschair da verer l’ingaschamaint dal giuven musicist paschiunà cun grondas ambiziuns.

Experimaint cun trais dirigents

Daspö duos on es la Società da musica Ftan in tschercha d’ün nouv dirigent. L’on passà ha Martin Stecher surtut la bachetta per ün temp limità. Quist on da musica han lura decis ils respunsabels da la società da far ün experimaint. Trais musicants han surtut il timun: Severin Paul Brugger – chi nun ha avant amo mai dirigi üna musica – ha surtut la rolla da manader musical. El es gnü sustgnü da Fadri Caprez e da Serafin Caprez, chi s’han eir partecipats quist inviern al cuors da dirigents chi’d es gnü organisà dal District da musica I. Per els duos es stat il concert da sonda passada sco ün examen final dal cuors da dirigent. Minchün dad els ha dirigi ün toc e l’applaus dal public es stat la conferma e l’indemnisaziun per lur ingaschamaint. Causa il squitsch da la premiera nun han els savü zoppantar dal tuot l’agitaziun da lur prüm act public culla bachetta in man.

La mort o la gloria

Il manader musical Severin Paul Brugger ha miss il concert suot il titel d’üna aventüra musicala. Quai impustüt causa la sfida musicala da l’inviern passà e l’experimaint cun trais dirigents sainza experienzas. Perquai d’eira il titel dal prüm toc cha las musicantas ed ils musicants han preschantà eir simbolic, nempe «Death or Glory». La Società da musica Ftan nun es insomma brich morta, il concert annual da sonda passada ha suottastrichà la gloria da quista società. «La via cuntinua ed il plaschair da far musica es avantman», ha constatà eir il nouv president da la musica da Ftan, Martin Wallnöfer. Chi detta adüna üna soluziun per cuntinuar han muossà las musicantas ed ils musicants da Ftan cun preschantar l’ouvra Bliss da Jacob de Haan. Quist toc vess la Società da musica Ftan nempe vuglü sunar a la festa da musica districtuala dal 2020 a Zernez. Quella jada es la festa gnüda sditta giò causa la pandemia da covid. Uossa – ses ons plü tard – han las giuvnas musicantas e musicants da Ftan preschantà la chanzun cun ün nouv dirigent. Il public ha gnü plaschair eir da las melodias plü cuntschaintas, per exaimpel cul arrandschamaint dad Abba Gold o culla Fuchsgraben Polka. L’aventüra musicala a Ftan ha gnü ün Happy End. E co cha’l president da la musica da Ftan ha tradi a la fin dal concert, cuntinua la collavuraziun cul manader da musica talentà eir l’on chi vain. E fin quella jada han eir ils duos ulteriurs nouvs dirigents ramassà daplü experienza e pon surtour amo daplü respunsabiltà musicala illa Società da musica Ftan. Ils pissers per l’avegnir da la società cun tantas pussibiltats e musicantas e musicants giuvens sun invan.