«La finamira ein ils top tschun dil Cup mundial»

Digl 1. entochen ils 3 da matg 2026 han liug ella Corea dil Sid las empremas cuorsas dil Cup mundial da mountainbike. Dalla partida a quellas ei era Vital Albin (27). Pil Lumnezian ein quellas la caschun da semesirar uonn per l’emprema ga cull’entira elita mundiala. «Igl ei grev da fixar ina finamira per quellas empremas cuorsas dil Cup mundial. Schegie che las preparativas ein stadas fetg bunas ed ils emprems resultats a cuorsas internaziunalas empermettents, ein cuorsas dil Cup mundial puspei in auter nivel. In resultat els top diesch fuss gia fetg buns all’entschatta dalla stagiun», di Vital Albin ch’ei carschius si a Tersnaus, mo che habitescha a Cuera. In ei denton cert: «Allas cuorsas da cross country dil Cup mundial less jeu seplazzar uonn ina ga ni l’autra denter ils tschun megliers.» Tut ils auters rangs naven dil sisavel entochen il 20avel hagi el gia occupau ils davos onns. Ussa seigi ei uras per in rang els top tschun. Il Cup mundial da cross country dumbra nov cuorsas quest onn.

Bunas preparativas

Treis cuorsas da mountainbike ed ina sin via ha Vital Albin gia absolviu questa primavera. El Swiss Cup a Rivera el Tessin eis el daventaus quart, cuort suenter ei reussiu ad el in rang da podest en ina cuorsa internaziunala ad Obergessertshausen en Germania. «Ils trenaments ein stai buns quest unviern. Jeu hai saviu entscheiver quels sin in bien nivel e hai il sentiment ch’jeu seigi sin in meglier nivel ch’igl onn vargau da quei temps», di Vital Albin. Avon rodund in onn suenter igl onn 2024 cun difficultads da sanadad e simtoms da sur-trenament, ha el stuiu entscheiver cullas preparativas sin in pli bass nivel: «Il mument marscha ei fetg bein. Jeu sun optimists per las cuorsas vegnentas.»

Lai e campiunadis mundials

Ina proxima caschun da semesirar internaziunalmein ha Vital Albin questa fin d’jamna el Tirol dil Sid. In punct culminont dalla stagiun pudessen allura las concurrenzas dil Cup mundial miez zercladur a Lai esser per Vital Albin: «Sch’ei capeta nuot extraordinari duess jeu esser lu en top fuorma.» Mo lu s’audan secapescha era ils campiunadis mundials dalla fin d’uost a Val d’Isole ell’Italia denter ils highlights d’uonn. Ils davos onns ha Vital Albin saviu sequalificar repetidamein per quels. Era pils vegnents eis el da buna speronza che quei reusseschi. «Il nivel dils Svizzers ei carschius ils davos dus ni treis onns. Sche tut va endretg, duess la qualificaziun pils campiunadis mundials denton buc esser periclitada», manegia il Lumnezian che ha terminau igl onn vargau il bachelor en giurisprudenza.

Contract cul team scroda

Ils proxims treis meins ein per Vital Albin d’impurtonza aunc ord in’autra vesta: «Miu contract cul Team Thömus Maxon scroda uonn. El decuors dil zercladur e fenadur vegnan las discussiuns menadas per ina cuntinuaziun.» Dapi otg onns ei Vital Albin en quei team svizzer. Buca mo il contract da Vital Albin cul Team Thömus Maxon scroda, mobein era quels da Mathias Flückiger e Lars Forster. «Las ambiziuns dil team ein fetg aultas. Jeu sesentel bein leu ed ina cuntinuaziun cul team ha prioritad per mei. Ei dat denton aunc auters fetg buns teams, aschia ch’ei dess alternativas», di Vital Albin.

Olimpia ei ina finamira

Suenter la carriera sco ciclist professiunal avisescha Vital Albin la via ella giurisprudenza: «Jeu less far il master e luvrar sin quei sectur. En tgei direcziun ch’jeu less sespecialisar, ei aunc buca decidiu.» Entochen che quei ei aschilunsch, savess ei denton aunc cuzzar plirs onns cumbinai cun entginas finamiras: «Aschi ditg ch’jeu hai plascher d’ir cun mountainbike sin quei nivel e las prestaziuns constattan, less jeu cuntinuar la via sportiva.» In da ses siemis ei la participaziun als Giugs olimpics 2028 a Los Angeles. «Alla cuorsa dil Swiss Cup dacuort el Tessin hai jeu viu ch’jeu s’audel denter ils megliers Svizzers. Pils giugs olimpics san dus sequalificar. Quei ei segiramein realistic», di Vital Albin.