Persunal malcuntent pervia da plans da lavur

Culla midada d’urari dil december 2025 ei la purschida dil traffic public en Surselva vegnida augmentada per rodund 30 %. Denter Glion e Cuera sco era denter Glion e Mustér curseschan ils trens ed ils autos da posta el tact da mesura.

Sfidas e malcuntentientschas

La nova purschida dil traffic public ha denton buca purtau mo avantatgs. Sper igl augment dallas colligiaziuns en favur dalla clientella ha il surpli da colligiaziuns era caschunau en certs cass dapli sfidas e malcuntentientschas tier il persunal digl Auto da posta Surselva. Manischunzas e manischunzs che vulan restar anonims, han exprimiu lur critica en discuors cun RTR: liungs temps da preschientscha, paucas uras pagadas e massa dis da lavur in suenter l’auter davos la roda da menar.

In che ughegia da s’exprimer

Hans Tüfer ei manischunz pensiunau. El ei staus sin viadi duront 35 onns cugl auto da posta ella regiun da Tavau. Hans Tüfer ei oz aunc gidonter tier l’interpresa Auto da posta. El ha buca retenientschas da metter il det ella plaga e discuorer publicamein cun numnar las sfidas pil persunal. «Igl ei schon fetg problematic. Ti entscheivas a luvrar la damaun allas 5.30, lavuras quater uras, has lu tschun uras pausa e stos il suentermiezdi puspei far vinavon. E la pausa ei buca pagada.» Tenor Hans Tüfer ei mo quei temps ch’il manischunz va cugl auto da posta pagaus.

Negin cass singul

Las sfidas numnadas existan buca mo en Surselva, mobein egl entir Grischun. Roger Walser, menader da la regiun ost dall’interpresa Auto da posta, ei cunscients dils problems. El di ch’el hagi capientscha per las malcuntentientschas. Auto da posta seigi en stretg contact cun tut las regiuns. Plans da survetsch nunattractivs cun biars e liungs temps da spetga hagien tenor el da far denter auter culla finanziaziun da las lingias. «La finanziaziun ei in punct central. Quellas lingias pon buca cuvierer ils cuosts. Aschia valan las reglas da giug dil stadi e dil cantun che ston vegnir risguardadas. Perquei san ins buca adina evitar ch’il persunal sto mintgaton spitgar. Ins savess naturalmein carrar dapli, mo quei paga negin.»

La clientella el center

Quei spagat seigi vegnius aunc pli pretensiuns cun l’introducziun dil tact da mesura en Surselva, declara il menader dalla regiun ost. Entochen ussa seigi igl urari en Surselva s’orientaus en emprema lingia tenor ils basegns dil menaschi. «Cul niev concept dil traffic public ch’il Cantun ha elaborau stat la clientella el center. Quei ha caschunau midadas che cattan buc adina ina buna accoglientscha tier il persunal. Nus essan pertscharts da quei.»

Contract collectiv vegn risguardaus

Malgrad ils plans da lavur nunattractivs e las liungas serias da survetsch risguardi Auto da posta ils dretgs da lavur ed il contract da lavur collectiv, il schi numnau GAV, di Roger Walser il menader dalla regiun ost dad Auto da posta. Adriano Troiano ch’ei responsabels pils autos da posta tier il sindicat ei dil medem avis. «Il team da planisaziun a Cuera sto risguardar ina massa prescripziuns cura ch’el fa ils plans da lavur. Quei fa che quella lavur daventa fetg pretensiusa.» Tier Auto da posta sefatschenta ina entira equipa dils plans da lavur. Els ston prender risguard sillas reglas e da medem mument garantir ch’ils autos curseschan. «Sch’enzatgi croda ora, entscheiva il calcular e planisar danovamein», declara il sindicalist.

Neginas soluziuns semplas

Anflar sligiaziuns per las sfidas dil persunal seigi tut gl’auter che sempel, analisescha Adriano Troiano dil sindicat. Auto da posta sestenti d’esser in bien patrun cun cundiziuns da lavur attractivas, manegia Roger Walser, il menader dalla regiun ost. La finamira seigi da vegnir da migliurar la situaziun pil persunal. Era igl anteriur manischunz Hans Tüfer conceda ch’ei seigi buca sempel d’anflar sligiaziuns. Ella situaziun actuala seigi ei denton impurtont ch’ei detti in barat constructiv. Roger Walser di che la fin digl onn 2026 vegni ei analisau con savens che la nova purschida vegni duvrada. Ina midada d’urari savessi lu segir puspei haver ina influenza sils plans da lavur dil persunal.