Istorgia chantada dad uffants

Ingon festagia la Scoula da musica Engiadina Bassa Val Müstair (EBVM) seis 50avel giubileum cun differents arrandschamaints musicals. Il prossem es als 19 avrigl 2026 a las 16.00 in sala polivalenta a Ramosch: Tuot las partecipantas e partecipants dals cuors fundamentals da musica da la scoula da musica regiunala, dimena las prümas classas da Samignun, Valsot, Scuol e contuorns, Zernez e Val Müstair dan, sco cha la scoula da musica scriva in üna comunicaziun als mezs d’infuormaziun, ün concert cul titel «Chacharel, il pitschen palantin da god». l toc ha scrit Nina Mayer chi’d es magistra da musica pro la a scoula  da musica EBVM. «L’idea da far ün concert cun tuot ils uffants dals cuors fundamentals da musica vaiva gnü il manader da la scoula da musica, Roberto Donchi», as regorda Nina Mayer, «e nus magistras vain ramassà chanzuns chi pudessan gnir in dumonda.» Per tillas inramar ha ella scrit l’istorgia dal pitschen palantin Chacharel. Sia figlia Mira ha illustrà il cudesch da chant ch’ella ha fat cun quist’istorgia. Quels purtrets da las differentas scenas gnaran muossats al di dal concert als 19 d’avrigl a Ramosch. Il prossem arrandschamaint pel 50avel giubileum da la scoula da musica regiunala es il «Bandmeeting» als 6 da gün a las 13.30 a Scuol i’l Club Stüva.